- ६ असार २०८३, शनिबार / Jun 20, 2026
ललितपुर । महिलाले मात्रै तान्ने रातो मच्छिन्द्रनाथको जात्रा आज बिहान सुरु भएको छ । रथयात्राको एक दिन महिलालाई मात्र रथ तान्न दिने परम्परा छ । सोही अनुसार नरिवल खसाल्ने जात्राको भोलिपल्ट आज बिहानै ललितपुरको थटीटोलमा एकल महिला जात्रा अन्तर्गत विधिवत् रुपमा महिलाहरुले रथ तानेका हुन् ।
रातो मच्छिन्द्रनाथसँगै मिननाथको रथलाई पनि महिलाहरुले लगनखेलबाट थटीटोल चौबाटोसम्म तानेर पुर्याएका हुन् । बैशाख २९ गते पूल्चोकबाट सुरु भएको रथयात्रा गाः बहाल सुन्धारा हुँदै लगनखेल पुर्याएपछि करिब १ सय मिटर तानेर थटीटोलसम्म महिलाहरुले रथ तानेर यो जात्रा मनाउने गरिन्छ ।
जात्रामा सबैको सहभागिता होस् र महिला र पुरुषमा कुनै पनि भेदभाव हुनुहुँदैन भन्ने मान्यताका साथ महिलाहरुले रथ तान्ने गरेका हुन् । मच्छिन्द्रनाथको रथलाई पाटन परिक्रमा गराउने क्रममा थटिटोलमा पुग्दा रथ हराएको र एक जना महिलासँग रहेको भन्ने थाहा भएपछि उनलाई पुजा गरेर फर्काएको स्मरणमा आजको जात्रालाई (याक मिसा भुज्या) एकजना महिलाको जात्रा भन्ने गरिन्छ ।
