- ४ कार्तिक २०८३, बुधबार / Oct 21, 2026
भक्तपुर । नेकपा एमालले जन नेता मदन भण्डारीको जन्म दिनमा सूर्यविनायक नगरपालिका वडा नं ९ नंखेलमा वृक्षारोपण गरेको छ । शुक्रबार एमालेका नेता स्वर्गीय मदन भण्डारीको ७३ औं जन्मजयन्ती तथा राष्ट्रिय वृक्षारोपण दिवसको अवसरमा नेकपा एमालेका महासचिव शंकर पोखरेलले वृक्षारोपण गर्दै कार्यक्रमको सुरुवात गरेका हुन ।
महासचिव पोखरेलले मदन जयन्तीलाई दुई वटा अभियानका साथ अगाडी बढाउने बताउँदै वृक्षारोपणको माध्यमबाट समृद्धिको यात्रामा जोडिने बताए । उनले एमालेको सरकार रहेको बेलामा यस दिनलाई राष्ट्रिय वृक्षारोपण दिवसको रुपमा घोषणा गरिएता पनि सरकारी रुपमा यसलाई अगाडी बढाउन नसकिएको उनले गुनासो थियो ।
महासचिव पोखरेलले पार्टीको हिसाबबाटै यस कार्यक्रमलाई अगाडी बढाउँदै उपत्यकाका दर्जनभन्दा बढी ठाउँमा वृक्षारोपण गरिएको जानकारी दिए । कार्यक्रममा मदन भण्डारीको जन्मजयन्तीलाई राष्ट्रिय वृक्षारोपण दिवसको रुपमा मनाउने प्रचलन एमालेले सुरुवात गरेको एमाले पोलिटब्यूरो सदस्य महेश बस्नेतले बताए ।
सुर्यविनायक जगंल प्राणी उद्यान बनाउने योजना बनाइएको तर गठबन्धन सरकार आ्एपछि उक्त योजना सफल नभएको बस्नेतले बताए । ‘हामीले भक्तपुरको विकास सँगसँगै भक्तपुरका सुन्दरता, उज्यालो भक्तपुर जस्ता अभियान पनि सुरु गरेका छौ ।
त्यसको फलस्वरुप उपत्यकाभरि सडक बत्ति राख्ने अभियान सुरु भयो । जुन निकै प्रभावकारी भएको छ ।’ उनले भने, ‘पछिल्लो गठबन्धन आएपछि यस्ता कार्यक्रमहरु पछाडी पारिएको छन् । आज यस जन्मजयन्तीबाट सरकारलाई यस्ता कार्यक्रमहरु अगाडी बढाउन दबाब पनि दिन आवश्यक छ । ’ उनले भने
नेकपा एमाले, केन्द्रीय वन तथा वातावरण विभाग, भक्तपुर जिल्ला कमिटी, बागमती प्रदेश वन तथा वातावरण विभाग र नेकपा एमाले सूर्यविनायक वडा नं ९ कमिटीको संयुक्त योजनामा उक्त कार्यक्रम भएको हो ।
