कार्यविधि विपरीत वीर अस्पतालमा मन्त्रीले राखे आफ्नै जिल्लाका १० सहित १३ कर्मचारी

कार्यविधि विपरीत वीर अस्पतालमा मन्त्रीले राखे आफ्नै जिल्लाका १० सहित १३ कर्मचारी image

काठमाडौं । कार्यविधि विपरीत करारमा कर्मचारी राखेको पाइएको छ । १३ जना कर्मचारीमध्ये १० जना स्वास्थ्य तथा जनसंख्यामन्त्री मोहनबहादुर बस्नेतको आफ्नै गृहजिल्ला सिन्धुपाल्चोकका रहेका छन् ।
कात्तिक १० गते वीर अस्पताल प्रशासनले सातौं तहको १ जना मेडिकल ल्याब, पाँचौ तहका ल्याब टेक्निसियन ५ जना, इलेक्ट्रिसियन चौथो तहका २ जना, पलम्बर चौथो तहको १ जना, चौथो तहकै लिफ्ट असिस्टेन्ट ४ जना गरी १३ जना करारमा राख्ने निर्णय गरेको थियो ।

तर ‘चिकित्सक वा स्वास्थ्यकर्मी करार सेवामा व्यवस्थापन गर्ने सम्बन्धी कार्यविधि–२०७६’ विपरीत १७ कात्तिकमै सबै कर्मचारी भर्ना गरेको पाइएको छ । करारमा जनशक्ति पदपूर्ति गर्दा न्यूनतम २१ दिनको सूचना प्रकाशन गरी इच्छुक उम्मेदवारबाट दरखास्त आह्वान गर्नुपर्ने करार सेवा व्यवस्थापनसम्बन्धी कार्यविधिमा व्यवस्था गरिएको छ । तर एक हप्ताको सूचना निकालियो र दरखास्त बुझाउने अन्तिम दिन १७ गते केही समय मात्रै सर्जिकल भवनमा टाँसिएको थियो ।

वीर अस्पतालका एक अधिकारीले भने, ‘सार्वजनिक रुपमा जानकारी नदिई केहीबेर मात्रै टाँसिएको जस्तो गरियो ।’ १९ गते कर्मचारी छनोटको लिस्ट सार्वजनिक भयो । करारमा राखिएका १३ जनामध्ये १० जना सिन्धुपाल्चोक जिल्लाका रहेका छन् । लिफ्ट असिस्टेन्टमा सिन्धुपाल्चोक बाह्रबिसेका दिपेन्द्र बस्नेत, सन्तोष बस्नेत, पाँचपोखरी थाङपालकी विमला अधिकारी, लिसंखु पाखरकी अन्जली तामाङ छन् ।

यसैगरी इलेक्ट्रिसियनमा मेलम्ची सिन्धुपाल्चोकका अरुण सापकोटा र सन्तोष दाहाल, पाँचौ तहको ल्याब टेक्निसियनमा मेलम्चीकी रस्मीता मिश्र, रुद्रमतीकी प्रमिला आचार्य, बाह्रबिसेका सन्तोष राउत छन् । मेडिकल ल्याब टेक्निसियनमा बाह्रबिसे सिन्धुपाल्चोककै स्मीता थापा नियुक्त भएकी छन् । तीन जना मात्रै अरु जिल्लाका परेका छन् ।

ल्याब टेक्निसियनमा दुधौली सिन्धुलीकी प्रमिला श्रेष्ठ र रसुवाकी स्मृति देवकोटा तथा पलम्बर पदमा बनेपा, काभ्रेका सुरेन्द्र दंगाललाई राखिएको छ । करार कर्मचारी छनोट समितिमा अस्पतालका निमित्त निर्देशक डा. श्रवण थापालाई संयोजक बनाइएको थियो ।

स्वास्थ्यमन्त्री बस्नेतले दबाबमा उनीहरुलाई नियुक्त गर्न लगाएको स्रोतले बताएको छ । फर्म तथा शुल्क लिएर राजस्व समेत दाखिला नगरेको पाइएको अस्पताल स्रोतले जनाएको छ । वीर अस्पतालले मंसिर १ गते मेडिकल अधिकृत ३० र स्टाफ नर्स २६ जना माग गरेको थियो ।

Kailashkhabar.com

Kailashkhabar.com

यो नेपाली भाषाको अनलाइन समाचार संस्था हो । हामी तपाईहरुमा देशविदेशका समाचार र विचार पस्कने गर्छौ । तपाईको आलोचनात्मक सुझाव हाम्रा लागी सधै ग्रह्य छ । हामीलाई पछ्याउनुभएकोमा धन्यवाद । हामीबाट थप पढ्न तल क्लिक गर्नुहोस् ।

कैलाश खवर का अरु लेखहरु पढ्नुस्

Prem Durbar Hotel and Nagarkot Zipline ResorthotelghyampedandaHotel City Gaon