मनसुन कमजोर बन्दै, आधिकारिक सूचनामात्र प्रयोग गर्न विभागको आग्रह

काठमाण्डौ, ३० साउन । मनसुनी वायुको प्रभाव क्रमशः कमजोर हुँदै गएको मौसम पूर्वानुमान महाशाखाले जनाएको छ। आज सुदूरपश्चिम प्रदेशलगायत देशका पहाडी भागमा साधारणतया बदली तथा बाँकी भागमा आंशिक बदली रहनेछ।

दिउँसो सुदूरपश्चिम प्रदेशका पहाडी भागका केही स्थान र तराईका एक–दुई ठाउँमा मध्यम वर्षाको सम्भावना रहेको छ। राति गण्डकी प्रदेशका पहाडी तथा तराई, साथै वाग्मती, लुम्बिनी र कर्णाली प्रदेशका पहाडी भागका केही स्थानमा मध्यम वर्षा हुने महाशाखाको पूर्वानुमान छ।

यसैबीच, जल तथा मौसम विज्ञान विभागले मौसम तथा बाढीसम्मन्धी भ्रामक र अपुष्ट सूचना सार्वजनिक भइरहेका कारण त्यस्ता सूचनामा विश्वास नगरी विभागको आधिकारिक स्रोत मात्र प्रयोग गर्न अनुरोध गरेको छ।

विभागले आफ्ना सूचना आधिकारिक वेबसाइट र सामाजिक सञ्जालमार्फत प्रकाशित हुने उल्लेख गरेको छ।