- १८ कार्तिक २०८३, बुधबार / Nov 4, 2026
मुस्ताङ, २८ भदौ । रसुवाको भोटेकोशीमा आएको बाढीका कारण रसुवागढी–केरुङ नाका बन्द भएपछि चीनसँगको व्यापारका लागि मुस्ताङको कोरलानाका प्रयोग बढेको छ । यसको प्रभाव मुस्ताङ भन्सार कार्यालयको राजस्व सङ्कलनमा समेत देखिएको छ ।
लोमान्थाङ गाउँपालिका–४ स्थित न्हेचुङमा रहेको मुस्ताङ भन्सार कार्यालयले पछिल्लो १५ दिनमा मात्रै एक अर्ब ७८ करोड ४४ लाख रुपैयाँ राजस्व सङ्कलन गरेको छ ।
भन्सार प्रमुख बिदुर चुडालका अनुसार रसुवागढी–केरुङ र तातोपानी नाका पूर्ण रूपमा बन्द भएपछि कोरलानाकाबाट चिनियाँ मालवस्तु आयात हुने क्रम उल्लेख्य रूपमा बढेको हो । शुक्रबार मात्रै मुस्ताङ भन्सार कार्यालयले २७ करोड ११ लाख रुपैयाँ राजस्व सङ्कलन गरेको छ । भदौ २२ गतेपछि दैनिक औसतमा करिब ३० करोड रुपैयाँ राजस्व सङ्कलन भइरहेको भन्सार प्रमुख चुडालले जानकारी दिए ।
उनका अनुसार शुक्रबार ७१ कन्टेनर र १०६ वटा विद्युतीय सवारीसाधनको भन्सार जाँचपास भएको छ । रसुवागढी नाका बन्द भएको भदौ १० गतेदेखि भदौ २५ गतेसम्म कोरलानाका हुँदै नेपाल भित्रिएका ४३४ कन्टेनर र ६४१ वटा विद्युतीय सवारीसाधनको भन्सार जाँचपास गरिएको छ ।
चालु आर्थिक वर्ष २०८३/८४ को साउनदेखि भदौ २५ गतेसम्म कोरलानाका हुँदै नेपाल भित्रिएका कन्टेनर तथा विद्युतीय सवारीसाधनको भन्सार जाँचपासबाट दुई अर्ब ३१ करोड ४४ लाख रुपैयाँ राजस्व सङ्कलन भएको भन्सार प्रमुख चुडालले बताए । भदौ ९ गतेसम्म भने कोरलानाका हुँदै १३३ कन्टेनर र १६३ वटा विद्युतीय सवारीसाधन नेपाल भित्रिएका थिए ।
यसअघि उपल्लो मुस्ताङका नागरिकका लागि मात्रै वर्षभर खुला रहने कोरलानाकालाई तातोपानी र रसुवागढी नाका बाढीपहिरो तथा नदी कटानका कारण अवरुद्ध भएपछि सरकारले वैकल्पिक निकासी तथा पैठारी नाकाका रूपमा प्रयोग गर्न थालेको थियो । सरकारले २०८२ भदौ ३१ गतेदेखि कोरलानाकालाई वैकल्पिक व्यापारिक नाकाका रूपमा खुला गरेको थियो ।
भन्सार प्रमुख चुडालका अनुसार आर्थिक वर्ष २०८२/८३ मा कोरलानाकाबाट भएको निकासी तथा पैठारीबाट मुस्ताङ भन्सार कार्यालयले ६ अर्ब ९२ करोड रुपैयाँ राजस्व सङ्कलन गरेको थियो । उक्त आर्थिक वर्षमा पैठारीतर्फ १४ अर्ब ४१ करोड रुपैयाँ र निकासीतर्फ २० करोड ५० लाख रुपैयाँ बराबरका मालवस्तुको कारोबार भएको थियो । गत आर्थिक वर्षमा कोरलानाका हुँदै तीन हजार २२३ वटा विद्युतीय सवारीसाधन र एक हजार ८७३ वटा कन्टेनरको भन्सार जाँचपास गरिएको भन्सार कार्यालयले जनाएको छ ।
