बाढी–पहिरोले यी राजमार्गमा यातायात प्रभावित, केही सडक पूर्ण रूपमा बन्द

मुख्य बुँदा

बाढी र पहिरोका कारण देशका विभिन्न प्रमुख राजमार्गमा यातायात प्रभावित भएको छ ।

रसुवा, नुवाकोट, धादिङ, सिन्धुपाल्चोक र कालीकोटका सडकखण्डमा अवरोध छ ।

केही सडक पूर्ण रूपमा अवरुद्ध छन् भने केहीमा एकतर्फी यातायात सञ्चालन भइरहेको छ ।

नुवाकोटको टोखा–छहरे सडकमा रातिको समयमा सवारी सञ्चालनमा रोक लगाइएको छ ।

धादिङको कृष्णभीरमा पृथ्वी राजमार्ग पूर्ण रूपमा अवरुद्ध छ ।

सिन्धुपाल्चोकको घट्टेखोलामा पहिरोका कारण अरनिको राजमार्ग बन्द छ ।

कालीकोटको गगने खोलामा पहिरो खस्दा कर्णाली राजमार्ग अवरुद्ध भएको छ ।

प्रहरीले प्रभावित सडकमा यात्रा गर्दा सावधानी अपनाउन तथा सम्भव भएसम्म वैकल्पिक मार्ग प्रयोग गर्न आग्रह गरेको छ ।

काठमाडौं, २७ भदौ । बाढी तथा पहिरोका कारण देशका विभिन्न प्रमुख राजमार्गमा यातायात प्रभावित भएको छ । नेपाल प्रहरीको पछिल्लो विवरणअनुसार बागमती र कर्णाली प्रदेशका विभिन्न सडकखण्डमा पूर्ण तथा एकतर्फी अवरोध रहेको छ ।

रसुवामा उत्तरगया गाउँपालिका–४ स्थित त्रिशूली–मैलुङ–स्याफ्रुबेँसी सडकखण्ड बाढीका कारण पूर्ण रूपमा अवरुद्ध रहेको प्रहरीले जनाएको छ । नुवाकोटमा बाढी तथा पहिरोको जोखिमका कारण टोखा–छहरे सडकखण्डमा रातिको समयमा सवारी सञ्चालनमा रोक लगाइएको छ ।

उक्त सडकखण्डमा राति १० बजेदेखि बिहान ५ बजेसम्म अर्को सूचना जारी नभएसम्म सवारी सञ्चालन गर्न नपाइने व्यवस्था गरिएको छ । पासाङल्हामु सडकखण्ड पनि बाढीका कारण पूर्ण रूपमा अवरुद्ध रहेको प्रहरीले जनाएको छ । धादिङमा बेनीघाट रोराङ गाउँपालिका–७ स्थित कृष्णभीरमा पहिरोका कारण पृथ्वी राजमार्ग पूर्ण रूपमा अवरुद्ध छ । बेनीघाट रोराङ गाउँपालिका–१० को ज्वालाखोला र शीतलबजार क्षेत्रमा भने सडक एकतर्फी रूपमा सञ्चालन भइरहेको छ ।

त्यस्तै, चितवनको ज्वालाखोला क्षेत्रमा सडक मर्मतका कारण एकतर्फी रूपमा सवारी सञ्चालन भइरहेको छ ।सिन्धुपाल्चोकमा भोटेकोशी गाउँपालिका–२ स्थित घट्टेखोलामा पहिरो खसेपछि अरनिको राजमार्ग पूर्ण रूपमा अवरुद्ध भएको छ ।

कालीकोटमा शुभकालिका गाउँपालिका–१ स्थित गगने खोलामा पहिरो खसेपछि कर्णाली राजमार्ग पनि पूर्ण रूपमा अवरुद्ध भएको प्रहरीले जनाएको छ ।

प्रभावित सडकखण्डको अवस्था

प्रहरीले प्रभावित सडकखण्डमा यात्रा गर्दा विशेष सावधानी अपनाउन आग्रह गरेको छ । सम्भावित जोखिमलाई ध्यानमा राख्दै यात्रुले सडकको अवस्था बुझेर मात्र यात्रा गर्न तथा आवश्यक परे वैकल्पिक मार्ग प्रयोग गर्न प्रहरीले अनुरोध गरेको छ ।