- ५ असार २०८३, शुक्रबार / Jun 19, 2026
मुख्य बुदा
नयाँ राष्ट्रिय युवा नीति–२०८२ अनुसार युवाको उमेर १८–३५ वर्ष कायम
राष्ट्रिय युवा नीति–२०७२ अनुसार पहिले १६–४० वर्ष थियो
नीति मुख्य ध्येय: युवालाई सक्षम र जिम्मेवार बनाउँदै राष्ट्र निर्माणमा सार्थक सहभागिता सुनिश्चित गर्नु
युवा परिषद्का कार्यकारी उपाध्यक्ष सुरेन्द्र बस्नेत: नयाँ नीति युवाको माग, आवश्यकतालाई सम्बोधन
नीति अनुसार युवाको सर्वाङ्गीण विकास, नैतिक, सृजनशील, उद्यमशील र प्रविधिमैत्री शक्ति विकास
स्टार्टअप, व्यवसाय संवर्द्धन केन्द्र, करिअर काउन्सेलिङ, स्वरोजगार कार्यक्रममा जोड
रोजगारी, हरित कृषि रोजगार, व्यवसायिक तालिम, उद्यमशीलता प्रतियोगिता, बीमा र कर्जा सुविधा सुनिश्चित
काठमाडौँ, १२ भाद्र । नेपाल सरकारले मन्त्रिपरिषद्को बैठकबाट हालै स्वीकृत राष्ट्रिय युवा नीति–२०८२ अनुसार युवाको उमेर १८–३५ कायम गर्ने निर्णय गरेको छ। यसअघि क्रियाशील रहेको राष्ट्रिय युवा नीति–२०७२ अनुसार युवाको उमेर १६–४० थियो।
युवा नीतिले ‘युवालाई सक्षम र जिम्मेवार बनाई राष्ट्र निर्माणमा सार्थक सहभागिता बढाउने’ मुख्य ध्येय तय गरेको छ। यसअन्तर्गत युवाको सर्वाङ्गीण विकास, राष्ट्रियताको भावना जागृत गर्दै समाज रूपान्तरण र राष्ट्र निर्माणमा उनीहरूको नेतृत्वदायी भूमिका सुनिश्चित गर्ने लक्ष्य राखिएको छ।
राष्ट्रिय युवा परिषद्का कार्यकारी उपाध्यक्ष सुरेन्द्र बस्नेतका अनुसार नयाँ नीति युवाको माग, आवश्यकतालाई मध्यनजर गर्दै ल्याइएको हो। उनले भने, ‘बालबालिका ऐनले १८ वर्षसम्मकालाई बालबालिका मान्ने भएकाले अन्तर्राष्ट्रिय परिवेश समेत ध्यानमा राखेर नयाँ नीति तयार पारिएको हो।’
नयाँ नीतिले युवालाई स्वस्थ, शिक्षित, उद्यमशील, सृजनशील, नैतिक, कर्तव्यपरायण र प्रविधिमैत्री बनाउने कुरामा जोड दिएको छ। अनुसन्धान, अन्वेषण र प्रविधिमा समावेशी सहभागिता सुनिश्चित गर्दै साइबर सुरक्षा र प्रविधिमैत्री राष्ट्र निर्माणमा योगदान पुर्याउने लक्ष्य राखिएको छ।
युवा नीतिमा स्टार्टअप, व्यवसाय संवर्द्धन केन्द्र, एकल बिन्दु सेवा केन्द्र, करिअर काउन्सेलिङ, रोजगारी र स्वरोजगारी कार्यक्रम, हरित कृषि रोजगार, उद्यमशीलता तालिम र प्रतियोगिता, व्यवसायिक बीमा, सहुलियतपूर्ण कर्जा र उत्पादनको बजार व्यवस्थापन मार्फत राष्ट्रिय तथा अन्तर्राष्ट्रिय श्रम बजारमा प्रतिस्पर्धी मानव पुँजी निर्माणमा योगदान पुर्याउने कार्यक्रम समावेश छन्।
