- १५ जेष्ठ २०८३, शुक्रबार / May 29, 2026
काठमाडाैं । नवलपुरमा व्यावसायिक रूपमा उत्पादन हुने सागसब्जीमा उच्च मात्रामा विषादी अवशेष फेला परेपछि कृषि विकास कार्यालय नवलपुरले विषादी प्रयोग न्यूनीकरणका लागि व्यापक सचेतना अभियान सुरु गरेकोछ ।
कृषि विकास कार्यालय, विषादी अवशेष द्रुत विश्लेषण प्रयोगशाला कावासोती तथा स्थानीय तहको संयुक्त पहलमा किसानलाई बारीमै पुगेर विषादीको सही प्रयोगबारे जानकारी दिने काम सुरु गरिएको कार्यालयका प्रमुख कुलप्रसाद तिवारीले बताए ।
हालै कावासोती कृषि थोक बजारमा ल्याइएका सागसब्जीको परीक्षण गर्दा काउलीमा अर्गानोफस्फेट विषादीको ९८ प्रतिशत अवशेष भेटिएको थियो । लगातार यस्ता नमूनामा विषादीको मात्रा बढी पाइएपछि अभियानलाई थप प्रभावकारी बनाइएको प्रमुख तिवारीले जानकारी दिए ।
योजनाअनुसार सागसब्जी उत्पादक किसान मात्र होइन, विषादी बिक्री गर्ने एग्रोभेट सञ्चालकहरूलाई समेत सही प्रयोग विधि, मात्रा, समय र मानव स्वास्थ्य तथा वातावरणमा पर्ने प्रभावबारे सचेत गराइँदै छ । देवचुली नगरपालिका कृषि विकास शाखाका प्रमुख गगन भट्टराईका अनुसार अभियानमा किसानलाई विषादीको प्रकार, प्रयोग अवधि, मात्रा, सुरक्षा उपकरणको उपयोग, भण्डारण र सुरक्षित नष्ट गर्ने विधि बारे विस्तृत प्रशिक्षण दिइन सक्छ ।
किसानले जथाभावी र अत्यधिक विषादी प्रयोग गर्दा बजारका सागसब्जीमा अवशेष भेटिने गरेको उल्लेख गर्दै प्रमुख तिवारीले भने, “सही तरिकाले विषादी प्रयोग गरे मात्र पनि विषादी अवशेष घट्छ र स्वास्थ्य जोखिम न्यून हुन्छ ।”
संयुक्त पहल प्रभावकारी बनेसँगै किसानले विषादी प्रयोग कम गर्दै लगेका र नवलपुरका व्यावसायिक फर्मबाट आउने सागसब्जीको गुणस्तर पनि सुधारिएको कृषि विकास कार्यालयले जनाएको छ ।
