- ३१ असार २०८३, बुधबार / Jul 15, 2026
बुटवल । सडक निर्माण सात वर्षमा पनि पूरा नभएपछि ठेक्का रद्द गरिएको छ । राजमार्ग चौराहादेखि गोलपार्कसम्मको बुटवलको मुख्य बजार क्षेत्र साढे तीन किलोमिटर सडक सात वर्षदेखि अलपत्र पर्दैआएको थियो ।
बिरुवा कन्स्ट्रक्सन कम्पनी प्रालिले समयमै निर्माण पूरा गर्न सङ्घ, प्रदेश र स्थानीय सबै तहका जनप्रतिनिधिको आग्रह र निर्देशनलाई बेवास्ता गरेपछि आज ठेक्का रद्द गरिएको हो । पटक–पटक आग्रह र निर्देशन दिदा पनि बेवास्ता गरेपछि ठेक्का तोडिएको सडक डिभिजन कार्यालय बुटवलका सूचना अधिकारी महेश्वर दाहालले बताए । कार्यालयले छिट्टै अर्को ठेक्का आव्हान गर्ने जनाएको छ ।
आर्थिक वर्ष २०७३,०७४ को तीन वर्षमा सक्ने गरी ठेक्का सम्झौता भएको आयोजनाको अहिलेसम्म ५० प्रतिशत मात्र काम सकिएको छ । उक्त आयोजना रु ५३ करोड ९७ लाख ९९ हजारमा ठेक्का लागेको हो ।
ठेक्का सम्झौताका सर्तबमोजिम दायित्व पूरा नगरेकाले सार्वजनिक खरिद ऐन, २०६३ को दफा ५९ अनुसार ठेक्का अन्त्य गर्ने निर्णय गरिएको हो । निर्माणाधीन सडक अलपत्र हुँदा बुटवल बजार क्षेत्र अस्तव्यस्त भएको छ ।
