संघीय संसदको महासचिवमा पद्मप्रसाद पाण्डेय नियुक्त

काठमाडौं । राष्ट्रपति रामचन्द्र पौडेलले माघ २३ गते मंगलबारदेखि लागू हुनेगरी संघीय संसदको महासचिव नियुक्त गरेका छन् । मंगलबार संघीय संसदका कार्यवाहक महासचिव पद्मप्रसाद पाण्डेयलाई महासचिव पदमा नियुक्त गरिएको हो । संसद सचिवालयका महासचिव भरतराज गौतमले राजीनामा दिएपछि पाण्डेयले कार्यवाहक महासचिवको जिम्मेवारी सम्हाल्दै आएका थिए।

प्रतिनिधिसभा सभामुख र राष्ट्रियसभा अध्यक्षले झन्डै दुई महिनाअघि नै पाण्डेयलाई महासचिव नियुक्तिका लागि सिफारिस गरे पनि राष्ट्रपति पौडेलले बल्ल नियुक्तिको निर्णय गरेका हुन्। उनले प्रतिनिधिसभाको सचिव पदबाट मंगलबारै बुझाएको राजीनामा राष्ट्रपतिले स्वीकृत गर्दै संघीय संसदको महासचिव नियुक्त गरेका हुन्।