- ११ जेष्ठ २०८३, सोमबार / May 25, 2026
काठमाडौं । सत्तारुढ नेकपा (माओवादी केन्द्र) ले राष्ट्रियसभाको अध्यक्ष पदमा दाबी गर्ने भएको छ। राष्ट्रियसभाको सबैभन्दा ठूलो दल भएकाले संसदीय दलको कार्यालय सिंहदरबारमा मंगलबार बसेको संसदीय दलको बैठकमा अध्यक्षमा दाबी गर्ने गरी छलफल भएको जनाएको छ ।
राष्ट्रियसभा अध्यक्ष कांग्रेसलाई दिने सहमति बने पनि कोशी प्रदेशमा कांग्रेसले फ्लोर क्रस गरेर एमाले उम्मेदवारलाई जिताएपछि माओवादीमा अध्यक्ष दिन नहुने मत बलियो बनेको माओवादी केन्द्रले जनाएको छ ।
यही माघ ११ गते भएको निर्वाचनबाट ५ सांसद जितेको माओवादी केन्द्र आगामी फागुन २१ पछि १८ सिटका साथ राष्ट्रियसभाको पहिलो दलको हैसियतमा रहने भएको छ।
प्रतिपक्षी दलले सत्तामा हुँदा एउटा विपक्षमा हुँदा अर्को भूमिका खेल्ने गरेकाले सत्ता गठबन्धनका दल र सांसदहरूको प्रतिवाद नपुगेको बताएको स्रोतले जनाएको छ।
कांग्रेसले नेता कृष्णप्रसाद सिटौलालाई अध्यक्ष बनाउने तयारी गरेको छ। माओवादीले दाबी नछाड्ने परिस्थितिमा गठबन्धनमा खटपट बढ्ने देखिएको छ।
