दशैंको मौकामा घर आएका ६ जना पक्राउ

काठमाडौं । दशैं मनाउन घर आएका ६ जना फरार प्रतिवादी पक्राउ परेका छन् । अदालतबाट फैसला भई कैद जरिवाना तोकिएर लामो समयदेखि फरार रहेका रौतहटमा विभिन्न मुद्दाका ६ जना अपराधीलाई प्रहरीले पक्राउ गरेको हो ।

पक्राउ पर्नेमा नजिर अन्सारी, सिहदान्त पासवान, रामसागर गिरी, पवनकुमार राउत कुर्मी, उमेश कुमार भन्ने अखिलेशकुमार यादव र राजेशकुमार यादव छन् ।दसैंको अवसरमा घरमा आई लुकिछिपी बसेको अवस्थामा उनीहरुलाई पक्राउ गरिएको जिल्ला प्रहरी कार्यालय रौतहटका प्रवक्ता एवम् डिएसपी दीपकुमार रायले बताए ।

अन्सारीलाई सवारी ज्यान मुद्दा, पासवानलाई चोरी मुद्दा, गिरीलाई बालबिबाह मुद्दा, कुर्मी र यादवलाई चोरी मुद्दामा जरिवाना र कैद तोकिएको डीएसपी रायले बताए । राजेशकुमार यादवलाई भने लागुऔषध मुद्दामा ५० हजार जरिवाना तोकिएको छ । पक्राउ परेका सबै प्रतिवादीलाई फैसला कार्यान्वयनको लागि बिहीवार जिल्ला अदालत गौरमा हाजिर गराइएको छ ।