- ६ असार २०८३, शनिबार / Jun 20, 2026
एजेन्सी । पानामा नहरबाट कुनै शुल्क नतिरी अमेरिकी जहाजहरू जाने भएका छन् । शुल्क नतिरी जाँदा अमेरिकाको प्रत्येक वर्ष करोडौं डलर बचत हुने अमेरिकाले जनाएको छ ।
अमेरिकी विदेश मन्त्रालयले पानामा नहर हुँदै जाने अमेरिकी जहाजहरूले कुनै शुल्क तिर्न नपर्ने जनाएको छ । अमेरिकी राष्ट्रपतिको शपथ लिएपछि डोनाल्ड ट्रम्पले आफ्नो पहिलो भाषणमा पानामा नहर चीनले सञ्चालन गरिरहेको दाबी गरेका थिए ।
राष्ट्रपति डोनाल्ड ट्रम्पको चर्को दबाबपछि अमेरिकी जहाजहरूले पानामा नहरबाट विना कुनै शुल्क पार गर्न अनुमति पाएका हुन् । अमेरिकाले पानामा नहरमाथि चीनको प्रभाव र नियन्त्रण परिवर्तन हुनुपर्ने बताउँदै आएको थियो ।
संयुक्त राज्य अमेरिकाले सन् १९०४ देखि १९१४ सम्म पनामा नहरको निर्माण गरेको थियो । हरेक वर्ष झन्डै १४ हजार वटा पानीजहाज यस नहर भएर यात्रा गर्छन् । तर सन् १९९९ मा पानामाले अमेरिकाबाट नहरको नियन्त्रण आफ्नो माताहत ल्याएको छ । यो नहर पानाको अर्थतन्त्रको मुख्य स्रोत हो ।
यसबाट पानामाले वार्षिक अर्बौं डलर राजस्व उठाउँछ भने हजारौं पानामेली नागरिकलाई रोजगारी दिएको छ । ट्रम्पले पानामा नहर हुँदै जाने अमेरिकी जहाजबाट लिइएको चर्को शुल्कलाई उद्धृत गर्दै नहर फिर्ता लिने धम्की समेत दिएका थिए ।
पानामा नहर विश्वको सबैभन्दा महत्त्वपूर्ण जलमार्गहरूमध्ये एक हो । यसले प्रशान्त र एट्लान्टिक महासागरलाई जोड्छ र अन्तर्राष्ट्रिय व्यापारमा महत्त्वपूर्ण भूमिका खेल्छ । पानामाको पहाड काटेर कृत्रिम जलाशय बनाइएको नहरको लम्बाइ झन्डै ८२ किलोमिटर लामो छ ।
