- ३० श्रावण २०८३, शनिबार / Aug 15, 2026
काठमाडौं । ताप्लेजुङमा प्रहरीले गोली चलाउँदा ४ जना घाइते भएका छन् । केवलकारको विषयमा झडप हुँदा प्रहरीको गोली लागेर ४ जना घाइते भएका हुन ।
घाइतेहरुको विराटनगरमा उपचार सम्भव नभएपछि काठमाडौं ल्याउने तयारी भएको छ। प्रहरीसँगको झडपमा यामबहादुर लिम्बू, सगुन लावती, धर्मान पालुङ्वा र मंगल लावती घाइते भएका हुन्। यामबहादुर, धर्मान र सगुन लावतीलाई प्रहरीले चलाएको गोली लागेको थियो।
फुङलिङ नगरपालिका– ११ पाथीभरा क्षेत्रमा केबलकार निर्माणको विरोध प्रदर्शनका क्रममा शनिबार साँझ भएको झडपमा प्रहरीले गोली चलाउँदा ४ जना घाइते भएका थिए।
४ जनामध्ये एकजना भने डिस्चार्ज भएका भएका छन्। उनीहरुको जिल्ला अस्पताल ताप्लेजुङमा उपचार सम्भव नभएपछि थप उपचारका लागि विराटनगर पठाइएको थियो। मंगल लावतीको अवस्था सामान्य रहेकाले डिस्चार्ज भएका हुन्।
घाइतेमध्ये गम्भीर ३ जनाको विराटनगरस्थित नोवेल मेडिकल कलेजमा उपचार सम्भव नभएपछि काठमाडौं पठाउने तयारी भएको जिल्ला प्रहरी कार्यालय ताप्लेजुङले जनाएको छ । मुकुम्लुङ बचाउ संघर्ष समितिले केबलकार निर्माणको विरोधमा सोमबारदेखि आन्दोलन गर्ने तयारी गरेको छ ।
आन्दोलनलाई रोक्न भन्दै आइतबार नै नेपाल प्रहरी र सशस्त्र प्रहरी खटिएको छ । झडपमा परेर नेपाल प्रहरी र सशस्त्र प्रहरीका २० जना घाइते भएको तर अवस्था समान्य रहेको जिल्ला प्रहरी कार्यालय ताप्लेजुले जनाएको छ ।
