- २२ कार्तिक २०८३, आईतवार / Nov 8, 2026
प्रहरीले अब पक्राउ परेका व्यक्तिको फोटो तथा भीडीओ सार्वजनिक नगर्ने
देशभरका प्रहरी कार्यालयहरूलाई यस विषयमा परिपत्र जारी
महान्यायाधिवक्ताको कार्यालयको निर्देशनपछि यो निर्णय कार्यान्वयनमा
जघन्य अपराधका अवस्था बाहेक, सामाजिक वा राज्यलाई असर पर्ने खण्डमा मात्र सम्बन्धित निकायको अनुमति लिएर सार्वजनिक गर्न सकिने
नेपाल प्रहरीले निजताको सम्मान र कानुनी प्रक्रियामा सुधार गर्न कदम उठायाे
काठमाडौँ, ८ साउन । नेपाल प्रहरीले अब कुनै पनि घटना वा अपराधमा पक्राउ परेका व्यक्तिको फोटो तथा भीडीओ सार्वजनिक नगर्ने निर्णय गरेको छ। प्रहरी प्रधान कार्यालयले यो निर्देश देशभरका प्रहरी कार्यालयहरूमा परिपत्र गरेको छ।
नेपाल प्रहरीका केन्द्रीय प्रवक्ता तथा नायब महानिरीक्षक विनोद घिमिरेका अनुसार, पक्राउ परेका व्यक्तिको फोटो र भीडीओ सार्वजनिक नगर्न र नपठाउन सबै प्रहरी युनिटलाई कडा रूपमा निर्देशन दिइएको छ।
यो निर्णय गत असारमा महान्यायाधिवक्ताको कार्यालयले फोटो तथा भीडीओ सार्वजनिक नगर्ने आदेश जारी गरेपछि आएको हो। उक्त निर्देशन प्रहरी प्रधान कार्यालयमा आएपछि तत्काल यसलाई कार्यान्वयन गर्न परिपत्र गरिएको छ।
प्रहरी प्रवक्ताले भने, “जघन्य अपराधका घटनामा वा फोटो तथा भीडीओ सार्वजनिक नगर्दा राज्य तथा समाजमा असर पर्ने अवस्था भएमा मात्र सम्बन्धित निकायको अनुमति लिएर सार्वजनिक गर्न सकिन्छ।”
यस कदमले पक्राउ परेकाहरूको निजताको सम्मान र कानुनी प्रक्रिया मजबुत बनाउन सहयोग पुग्ने अपेक्षा गरिएको छ।
