- ३ आश्विन २०८३, शनिबार / Sep 19, 2026
काठमाडौं । प्रधानमन्त्री वालेन्द्र शाह ‘बालेन’ले संविधानको अक्षर र भावना दुवैप्रति सरकार पूर्णरूपमा प्रतिबद्ध रहेको बताएका छन् । संविधान दिवसका अवसरमा काठमाडौंको टुँडिखेलमा आयोजित विशेष समारोहलाई सम्बोधन गर्दै प्रधानमन्त्री शाहले संविधानले जनतासँग गरेका प्रतिबद्धता पूरा गर्ने र देशमा सुशासन कायम गर्ने विषयमा सरकार स्पष्ट रहेको बताएका हुन् ।
उनले संविधान जतिसुकै राम्रो भए पनि त्यसलाई कार्यान्वयन गर्ने नेतृत्व इमानदार नभए संविधान कागजमा मात्र सीमित हुने बताए । सुशासन नारामा मात्र सीमित विषय नभई व्यवहारमै कार्यान्वयन गर्नुपर्ने विषय भएको उनको भनाइ थियो ।
प्रधानमन्त्री शाहले देशलाई रूपान्तरण गर्न पुरानै कार्यशैली र परिपाटीबाट अघि बढ्न नसकिने बताए । भ्रष्टाचार र दण्डहीनताको अन्त्य गर्दै सुशासन कायम गर्न सरकार प्रतिबद्ध रहेको उनले स्पष्ट पारे ।
‘संविधानको अक्षर र भावना दुवैप्रति यो सरकार पूर्णरूपमा प्रतिबद्ध छ । संविधान जति राम्रो भए पनि त्यसलाई चलाउने हातहरू इमानदार भएनन् भने त्यो कागजमा मात्रै सीमित हुन्छ,’ प्रधानमन्त्री शाहले भने । उनले सरकारको कामको सुरुवात भएको र अझै धेरै काम गर्न बाँकी रहेको उल्लेख गर्दै भ्रष्टाचार र दण्डहीनताको जरो उखेल्न सरकार दृढ भएर अघि बढ्ने बताए ।
