- २१ भाद्र २०८३, आईतवार / Sep 6, 2026
काठमाडौं, १३ माघ २०८२ । प्रधानमन्त्री सुशीला कार्कीले निर्माणाधीन काठमाडौं–तराई द्रुतमार्गको निरीक्षण गरेकी छन् । उनले आज बिहान नेपाली सेनाका अधिकारी तथा उच्चपदस्थ कर्मचारीहरूको टोलीसहित द्रुतमार्गको स्थलगत निरीक्षण गरेकी हुन् ।
निरीक्षणका क्रममा प्रधानमन्त्री कार्कीले आयोजनाको हालसम्मको प्रगतिबारे जानकारी लिँदै कामलाई तीव्र रूपमा सम्पन्न गर्न निर्देशन दिएकी थिइन् । उनले द्रुतमार्ग राष्ट्रिय प्राथमिकताको आयोजना भएकाले समयमै सम्पन्न गर्न सरकारले आवश्यक सबै सहयोग गर्ने प्रतिबद्धता व्यक्त गरिन् । काठमाडौं–तराई द्रुतमार्ग राष्ट्रिय गौरवको आयोजना हो । काठमाडौं उपत्यकालाई बाराको निजगढसँग जोड्ने छोटो दूरीको यो मार्गलाई रणनीतिक तथा आर्थिक दृष्टिले अत्यन्त महत्त्वपूर्ण मानिन्छ ।
करिब ७१ किलोमिटर लामो यो द्रुतमार्गको निर्माण नेपाली सेनाको व्यवस्थापन तथा निगरानीमा भइरहेको छ । आयोजनालाई २०८३ चैत मसान्तसम्म सम्पन्न गर्ने लक्ष्य राखिएको भए पनि नीतिगत जटिलता, भौगोलिक कठिनाइ र जग्गा अधिग्रहणलगायतका समस्याका कारण निर्माण प्रक्रिया प्रभावित हुँदै आएको छ । आयोजनाको २०८२ असार मसान्तसम्म समष्टिगत भौतिक प्रगति ४२.१३ प्रतिशत पुगेको छ ।
