- ३० भाद्र २०८३, मंगलवार / Sep 15, 2026
दोलखा । सुत्केरी तथा गर्भवती अवस्थामा रहेका स्थानीय महिलाहरुलाई दोलखाको वैतेश्वर गाउँपालिकाले पोषण सामाग्री वितरण गरेको छ्। गाउँपालिकाले वडा नम्बर १ गैरिमुदिका सुत्केरी तथा गर्भवती अवस्थामा रहेका स्थानीय महिलाहरुलाई पोषण साम्रगी वितरण गरेको हो ।
पोषण सामग्री वितरण गर्दै वैतेश्वर गाउँपालिकाका अध्यक्ष छवि लामाले गाउँपालिकाले वडा नम्बर–१ मात्रै नभई सबै वडामा पोषण कार्यक्रम संचालन गर्दै आएको जानकारी दिनुभयो । पालिकाले हजार दिने आमा तथा गर्भ अवस्थामा रहेका महिलालाई पोषण सामग्री अन्तर्गत पर्ने हर्लिक्स, चना,दुई क्रेटका दरले अन्डा,गेडागुडी,साबुन लगायतका सामग्री वितरण गरेको अध्यक्ष लामाको भनाई छ ।
पालिकाको चालु वर्षको महिला तथा बालबालिका लक्ष्यित कार्यक्रम अनुसार वडा नम्बर–१ का दुई वर्ष मुनिका बालबालिका र गर्भवती महिलाहरुलाई उक्त सामग्री वितरण गरिएको वैतेश्वर गाउँकार्यपालिका सदस्य ठुलिकान्छी विकले जानकारी दिनुभयो।
कार्यक्रममा वडा नम्बर एक का ८० जना गर्भवती महिला तथा हजार दिने आमा हरुलाई पोषण सामग्री वितरण गरिएको वैतेश्वर गाउँपालिकाले जनाएको छ । पोषण सामग्री वितरण वैतेश्वर गाउँपालिका–१ का वडा अध्यक्ष भिमबहादुर तामाङको अध्यक्षयता तथा पालिका अध्यक्ष छवि लामा र उपाध्यक्ष कल्पना उप्रेतीको उपस्थितिमा वितरण गरिएको हो ।
