- ५ असार २०८३, शुक्रबार / Jun 19, 2026
काठमाण्डौ, २९ भाद्र । नेपाल राष्ट्र बैंकले एक अर्ब २० करोड रुपैयाँ बराबरको रकम बैंक तथा वित्तीय संस्थामा मुद्दती निक्षेपमा लगानी गर्ने भएको छ। बैंकको उपदान तथा पेन्सन कोषमा रहेको रकम लगानी गर्नुपर्ने भएकाले इच्छुक बैंक तथा वित्तीय संस्थालाई सहभागिताका लागि आग्रह गरिएको हो।
केन्द्रीय बैंकले भोलि सोमबारसम्म निवेदन दिनुपर्ने जनाएको छ। राष्ट्र बैंकले ‘क’ वर्गका वाणिज्य बैंकमा एक अर्ब चार करोड, ‘ख’ वर्गका विकास बैंकमा १९ करोड ५० लाख र ‘ग’ वर्गका वित्त कम्पनीमा छ करोड ५० लाख बराबरको रकम लगानी गर्नेछ।
बैंकबाट तोकिएको न्यूनतम कुल पुँजीकोष कायम भएको र निष्क्रिय कर्जा सापटीको अनुपात आठ प्रतिशत तथा खुद निष्क्रिय कर्जा अनुपात तीन प्रतिशत ननाघेको हुनुपर्ने सूचनामा उल्लेख छ। इच्छुक संस्थाले आफूले लिन चाहेको रकम र ब्याजदर प्रस्ताव गरी आवेदन दिनुपर्ने केन्द्रीय बैंकले सूचनामार्फत जानकारी दिएको छ।
