- २३ भाद्र २०८३, मंगलवार / Sep 8, 2026
काठमाडौं, २३ भदौ । काठमाडौंको गौरीघाटस्थित जलमापन केन्द्रमा बागमती नदीको जलसतह सतर्कता तह पार गरेको छ । बाढी पूर्वानुमान महाशाखाले बागमती नदीको जलसतह सतर्कता तह पार गरेकाले नदी आसपासका क्षेत्र तथा डुबान भइरहने ठाउँका बासिन्दालाई उच्च सतर्कता अपनाउन आग्रह गरेको छ ।
महाशाखाका अनुसार नदीको जलसतह बढिरहेकाले जोखिमयुक्त क्षेत्रमा बसोबास गर्ने नागरिकले आवश्यक सावधानी अपनाउनुपर्नेछ । नदी किनार तथा डुबानको जोखिम रहेका स्थानमा अनावश्यक आवतजावत नगर्नसमेत आग्रह गरिएको छ । हाल देशभर मनसुनी वायुको प्रभाव रहेको छ । मनसुनको न्यूनचापीय रेखा सरदर स्थानभन्दा केही उत्तरतर्फ रहेको महाशाखाले जनाएको छ ।
यसैगरी, भारतको उत्तर प्रदेश आसपास विकसित भएको न्यूनचापीय क्षेत्रको समेत प्रभाव नेपालमा रहेको जनाइएको छ । यी मौसमी प्रणालीका कारण विभिन्न स्थानमा वर्षा तथा नदीको जलसतह बढ्न सक्ने भएकाले सतर्कता अपनाउन महाशाखाले आग्रह गरेको छ ।
