- २२ असार २०८३, सोमबार / Jul 6, 2026
काठमाडौं । पूर्व गृहमन्त्री तथा राष्ट्रिय स्वतन्त्र पार्टी (रास्वपा) का सभापति रवि लामिछाने पक्राउ परेका छन् । राष्ट्रिय स्वतन्त्र पार्टी (रास्वपा) को कार्यालय बनस्थलीबाट शुक्रबार नेपाल प्रहरीको केन्द्रीय अनुसन्धान ब्युरोको टोली लामिछानेलाई नियन्त्रण लिएको हो ।
प्रहरीले लामिछानेलाई पोखरा लैजान वुद्ध एअरमा टिकट बुक गरेको भए पनि लामिछानेले भने सडक मार्ग हुदै पोखरा जाने अडान राखेपछि प्रहरीले सडक मार्ग हुँदै पोखरा लैजाने भएको हो । लामिछानेलाई भोलि कास्की जिल्ला अदालतमा पेश गर्न पोखरा लगिएको हो ।
लामिछानेलाई सडक मार्ग हुदै पोखरा लगिने भएको छ । यसअघि कास्की जिल्ला अदालतले पोखराको सूर्यदर्शन सहकारीको रकम अपचलन गरेको आरोपमा लामिछानेलाई शुक्रबारै पक्राउ गर्न अनुमति दिएको थियो । यसअघि शुक्रबारै अपरान्ह कास्की जिल्ला अदालतका न्यायाधीश कृष्णजङ शाहको इजलाशले अनुसन्धानका लागि नियन्त्रणमा लिने अनुमति दिएको थियो ।
सूर्यदर्शन सहकारीकै रकम अपचलन गरेको आरोपमा गत असोज ६ मा पूर्व डीआईजी छविलाल जोशी पक्राउ परेका थिए । प्रहरीले जोशीको बयान लिइसकेको छ । पूर्व डीआईजी जोशी, पूर्व गृहमन्त्री लामिछाने र सूर्यदर्शन सहकारीको संस्थापक अध्यक्ष गीतेन्द्रबावु (जीबी) राई गोर्खा मिडियाका साझेदार हुन् ।
सहकारी ठगी छानविनका लागि गठित संसदीय समितिले विभिन्न सहकारीबाट गोर्खा मिडिया नेटवर्कमा ६५ करोड ५४ लाख रुपैयाँ अवैध तरिकाले लगानी गरेको ठहर गरेको थियो । त्यसलगत्तै सीआइबी टोली बनस्थलीस्थित रास्वपा कार्यालयमा पुगेको थियो ।
लामिछाने पक्राउ पर्ने हल्ला चलिसकेकाले लामिछाने विपक्षी दलहरुको वैठकबाट सोझै वनस्थलीस्थित पार्टी कार्यालय पुगेका थिए । सूर्यदर्शन सहकारीका अध्यक्ष गीतेन्द्रबावु (जीबी) राईसँग मिलेर लामिछानेले गोर्खा मिडिया नेटवर्कमा रकम ल्याएर अपचलन गरेको मुद्दा जिल्ला प्रहरी कार्यालय कास्कीले अनुसन्धान गरिरहेको छ ।
