चितवनमा हुर्किएका रुद्रकली र खगेन्द्र हात्ती उपहारस्वरूप कतार प्रस्थान गर्दै

काठमाडौं, २९ मंसिर । चितवन राष्ट्रिय निकुञ्जमा जन्मिएर हुर्किएका रुद्रकली र खगेन्द्र नामका हात्तीको जोडीलाई नेपाल सरकारले उपहारस्वरूप कतार पठाउने तयारी पूरा गरेको छ । सोमबार चितवनको सौराहाबाट ती हात्तीको औपचारिक बिदाइ कार्यक्रम आयोजना गरिने निकुञ्ज प्रशासनले जनाएको छ ।

चितवन राष्ट्रिय निकुञ्जका सूचना अधिकारी अभिनास थापामगरका अनुसार हात्तीको जोडी पुस २ गते भैरहवा अन्तर्राष्ट्रिय विमानस्थलमार्फत कतार उड्नेछ । २०८१ वैशाख ११ र १२ गते कतारका अमिर शेख तमिम बिन हमाद अल थानीको नेपाल भ्रमणका क्रममा नेपाल सरकारले एक जोडी हात्ती उपहार दिने निर्णय गरेको थियो ।

उक्त निर्णयअनुसार सौराहास्थित हात्ती प्रजनन तथा तालिम केन्द्र खोरसोरमा जन्मिएका रुद्रकली र खगेन्द्रलाई कतार पठाउन लागिएको हो । खगेन्द्रप्रसाद भाले र रुद्रकली पोथी हात्ती हुन् र दुवैको उमेर ६–६ वर्ष रहेको छ ।

वन्यजन्तु तथा वनस्पतिको अन्तर्राष्ट्रिय व्यापार महासन्धि साइटिससँग सम्बन्धित मापदण्ड तथा अन्य कानुनी प्रक्रिया पूरा गर्न समय लागेकाले हात्ती पठाउने कार्य ढिला भएको निकुञ्जका अधिकारीहरूले बताएका छन् । नेपालमा वन्यजन्तु संरक्षण सुरु भएयता विभिन्न मित्रराष्ट्रलाई जनावर उपहार दिने अभ्यास रहँदै आएको छ ।
यद्यपि हात्ती उपहार दिने निर्णय भने यो पहिलो पटक भएको हो ।

यसअघि नेपाल सरकारले चीनसहित भारत, अमेरिका, जर्मनी, बंगलादेश, बेलायत, जापान र अस्ट्रेलियाजस्ता देशलाई गैंडा उपहार दिइसकेको छ । त्यसैगरी ४७ प्रकारका वन्यजन्तु तथा आखेटोपहार र करिब एक सय २० वटा घडियाल र मगर गोहीका अन्डा पनि विभिन्न देशलाई उपहारस्वरूप प्रदान गरिएका छन् ।