साफ वुमन्स च्याम्पियनसिपमा नेपालको बलियो उपस्थिति

काठमाडौं । साफ वुमन्स च्याम्पियनसिप २०२४ अन्तर्गत समूह चरणको अन्तिम दुई खेल आज हुँदैछ । यस च्याम्पियनसिपमा नेपालको बलियो उपस्थिति रहेको छ । आज समूह बी मा रहेको घरेलु टोली नेपालले श्रीलंकासँग खेल्दै छ । भुटान र माल्दिभ्सबीच प्रतिस्पर्धा हुनेछ ।

यी दुई खेलपछि सेमिफाइनल समिकरण पनि तय हुनेछ । समूह बी बाट आयोजक नेपालसहित भुटान र श्रीलंका सेमिफाइनल पुग्ने होडमा छन् भने लगातार दुई खेल हारिसकेको माल्दिभ्स समूह चरणबाटै बाहिरिसकेको छ । नेपाल र भुटान यस समूहमा अपराजित छन् र दुवैको समान ४ अंक छ । गोलअन्तरमा नेपाल अघि छ । पहिलो खेलमा नेपाल र भुटानले गोलरहित बराबरी खेलेका थिए ।

दोस्रो फुटवल खेलमा नेपालले माल्दिभ्सलाई ११ ० ले हरायो भने भुटानले श्रीलंकालाई ४ १ ले पराजित गर्‍यो । नेपाल र श्रीलंका तथा भुटान र माल्दिभ्सबीचको खेलको नतिजापछि समूह बी बाट सेमिफाइनल पुग्ने दुवै टोलीको टुङ्गो लाग्नेछ । भुटान र माल्दिभ्सबीचको खेल दिउँसो साढे १ बजे सुरु हुनेछ । यस्तै नेपाल र श्रीलंकाबीचको खेल साँझ साढे ५ बजे सुरु हुनेछ । दुवै खेल त्रिपुरेश्वरस्थित दशरथ रंगशालमा हुनेछ ।