- २४ भाद्र २०८३, बुधबार / Sep 9, 2026
कञ्चनपुर । लालझाडी गाउँपालिका–४ दोदा नदीमा पक्की पुल निर्माण थालिएको ८ वर्ष पुग्यो । यो अवधिमा पुलका तीन वटा पिलर मात्रै ठडिएका छन् ।
तीन वर्षभित्र सक्नेगरी लुम्बिनी राजेन्द्र कुमार श्रेष्ठ जेभी कम्पनीसँग २०७२ पुस २६ गते पक्की पुल निर्माणको सम्झौता भएको थियो । पटक–पटक म्याद थप हुँदा पनि अहिलेसम्म पुल निर्माणले गति लिन सकेको छैन ।
मापदण्ड विपरित तीनवटा पिलर निर्माण गरिएको पाइएपछि पुलको डिजाइन नै फेरिएको छ । निर्माण कम्पनीलाई बारम्बार ताकेता गर्दैआएपनि सुनुवाइ नभएको सडक डिभिजन कार्यालय महेन्द्रनगरका सूचना अधिकारी इन्जिनियर तारानाथ सिग्देलले बताए ।
२०७८ साउनमा पुलको नयाँ डिजाइन तयार गरिएको थियो ।विभिन्न बहाना बनाएर निर्माण कम्पनीले काम अघि नबढाएको इन्जिनियर सिग्देलको आरोप छ । पक्की पुलको लागत रु २४ करोड ५२ लाख रहेको छ । रु १२ करोड भुक्तानी भइसकेको छ । पुल निर्माणले गति नलिँदा स्थानीय निराश बनेका छन् ।
पुल निर्माण नहुँदा लालझाडी गाउँपालिका ओहोरदोहोर गर्न स्थानीयले सास्ती खेपिरहेका छन् । स्थानीयले शुल्क तिरेर काठको अस्थायी पुल प्रयोग गर्दैआएका छन् । काठको पुल प्रयोग गरेबापत साइकलको रु १० र मोटरसाइकलको रु २० शुल्क तिर्ने गरेका छन् ।
