- २८ आश्विन २०८३, बुधबार / Oct 14, 2026
काठमाडौँ, २८ असाेज । साउदी अरबको किङ खालिद अन्तर्राष्ट्रिय विमानस्थलमा भएको आक्रमणमा परी घाइते भएका दुई जना नेपाली खतरामुक्त रहेका छन् । उनीहरूको अस्पतालमा उपचार भइरहेको र अवस्था सुधारोन्मुख रहेको साउदी अरबस्थित नेपाली राजदूतावासले जनाएको छ ।
दूतावासका अनुसार घाइते दुवै जनाको उपचार जारी छ । उनीहरू खतराभन्दा बाहिर रहेकाले चाँडै अस्पतालबाट डिस्चार्ज हुन सक्ने जनाइएको छ । आक्रमणका क्रममा भिडियो खिचेको आरोपमा पक्राउ परेका अर्का नेपालीलाई पनि साउदी सरकारले रिहा गरेको छ । आक्रमणको दृश्य खिचेको भन्दै उनलाई नियन्त्रणमा लिइएको थियो ।
हुथी विद्रोहीले गरेको उक्त आक्रमणमा एक जनाको मृत्यु भएको थियो भने ११ जना घाइते भएका थिए । घटनापछि साउदी अरबमा रहेका नेपाली नागरिकको सुरक्षालाई प्राथमिकतामा राख्दै नेपाली राजदूतावासले निगरानी तथा समन्वयलाई तीव्र बनाएको छ ।परराष्ट्र मन्त्रालयले पनि नेपाली राजदूतावास, रियाद साउदीका सम्बन्धित निकायसँग निरन्तर सम्पर्क र समन्वयमा रहेको जनाएको छ ।
दूतावासले सम्बन्धित स्थानीय निकायबाट जारी सूचना तथा सुरक्षा निर्देशन पूर्ण रूपमा पालना गर्न नेपाली नागरिकलाई आग्रह गरेको छ । कुनै समस्या परेमा तत्काल नेपाली राजदूतावासमा सम्पर्क गर्नसमेत अनुरोध गरिएको छ ।
