गर्मी बढेर विद्यार्थी बेहोस हुनथालेपछि विद्यालय बन्द

काठमाडौं । बढ्दो गर्मीका कारण विद्यार्थीहरु बेहोस हुन थालेपछि पर्साका स्थानीय विद्यालय बन्द गर्ने निर्णय गरेको छ । लगातार बढ्दै गएको गर्मीका कारण अध्ययन अध्यापनमा समस्या उत्पन्न हुन थालेपछि पर्सा जिल्लाका पालिकाहरुले विद्यार्थीको स्वास्थ्यमा परेको प्रतिकूलतालाई कम गर्न विद्यालय विदा दिने निर्णय गरेका हो ।

मधेस प्रदेशमा रहेको एक मात्र महानगरपालिका वीरगन्ज महानगरपालिकाले सूचना प्रकाशित गरी असोज ८ र ९ गते विद्यलायको अध्ययन अध्यापन स्थगित गर्ने निर्णय गरेको हो ।

अध्ययन कै क्रममा विद्यार्थीहरु बेहोस हुन थालेकाले विद्यलायको प्रशासनिक कार्यलाई निरन्तरता दिदै हाल दुई दिनका लागि पठन पाठन स्थगित गर्ने निर्णय गरिएको वीरगन्ज महानगरपालिकाको शैक्षिक प्रसाशन महाशाखाका प्रमुख अरविन्दलाल कर्णले बताए ।

त्यसैगरी पर्साकै पोखरिया नगरपालिकामा संचालित रहेका उचँगल माविमा अध्ययनरत ८ जना छात्रा हिजो गर्मीका कारण बेहोस भएपछि नगपालिकाले अध्ययन अध्यापनलाई विहानको सिफ्टमा संचालन गर्न सुचना प्रकाशित गरेको छ । तीन दिन यता तापाक्रम वृद्धी हुँदै ४५ डिग्रीसम्म पुगेको छ ।