- २४ आश्विन २०८३, शनिबार / Oct 10, 2026
काठमाडौं । हिजो सिन्धुलीको गोलञ्जोर गाउँपालिका–१ कुँडुलेबाट सुनकोशी नदीमा खसेको जिप गोताखोरको टोलीले फेला पारेको छ । जिपमा सवार तीन जना अझै बेपत्ता छन् । आज बिहानपख २ बजेतिर गाडि फेला परेको जिल्ला प्रहरी कार्यालय सिन्धुलीका एसपी गोविन्द काफ्लेले बताए ।
उनले भने, ‘गाडि त भेटियो तर मान्छे अझै भेटिएका छैनन् अहिले खोजी कार्य जारी छ ।’ खोटाङको हलेसीबाट भक्तपुरआउँदै गरेको प्रदेश ३–०१–०२३ च ६३६६ नम्बरको इसुजु हाइलेक्स गाडि शनिबार साँझ करिब साढे ५ बजेतिर सिन्धुलीको गोलञ्जोर गाउँपालिका–१ कुँडुलेबाट सुनकोशी नदीमा खसेको थियो ।
सो गाडी सुनकोशी नदीमा खस्दा भक्तपुर सूर्यविनायक नगरपालिकाका ३२ वर्षीय अबिन बाके, ३० वर्षीय प्रनित स्यागु र ३७ वर्षीय बलराम घटुवा बेपत्ता भएका छन् । गाडिबाट हामफालेका सुशान्त कक्षपति घाइते अवस्थामा छन् । उनको उपचार खुर्कोटमा भइरहेको छ ।
जिप खसेको जानकारी पाएलगत्तै सशस्त्र प्रहरी बलको विपद व्यवस्थापन बेस खुर्कोटबाट गोताखोरसहितको टोली खोजी कार्यमा खटिएको छ । बेपत्ता व्यक्तिहरुको खोजी कार्य जारी रहेको र आफू अहिले घटनास्थलतर्फ लागेको जिल्ला प्रहरी प्रमुख एसपी काफ्लेले कैलाश खबरलाई जानकारी दिए ।
