सुनसरीको लौकहीमा ब्राउन सुगरसहित एक भारतीय नागरिक पक्राउ

काठमाडौँ, १५ असार । सुनसरी जिल्लाको कोशी गाउँपालिका–१, लौकहीबाट सशस्त्र प्रहरीले ब्राउन सुगर जस्तो देखिने खैरो पदार्थसहित एक जनालाई नियन्त्रणमा लिएको छ।

शनिबार भारतको घर भएका ३५ वर्षीय गणेश शर्मालाई सशस्त्र प्रहरी बल नेपाल बोर्डर आउट पोष्ट (BOP) लौकहीले गस्तीका क्रममा पक्राउ गरेको हो।

शर्मा बीआर ५० एए ८३६७ नम्बरको मोटरसाइकलमा नेपालतर्फ आउँदै गर्दा शङ्कास्पद गतिविधि देखिएकाले सुरक्षाकर्मीले जाँच गरेका थिए।

जाँचका क्रममा उनको साथमा प्लास्टिकले बेरिएको ६.६ ग्राम ब्राउन सुगर जस्तो देखिने खैरो पदार्थ फेला परेको सशस्त्र प्रहरीले जनाएको छ। पक्राउ परेका व्यक्तिलाई बरामद लागूऔषधसहित आवश्यक कारबाहीका लागि सम्बन्धित निकायमा बुझाइएको छ।