- ३१ बैशाख २०८३, बिहीबार / May 14, 2026
हेटाैडा, १५ मंसिर । बागमती प्रदेशका स्वास्थ्य मन्त्री किरण थापा मगरले सीमित स्रोत–साधनका कारण अस्पताल सञ्चालनमा चुनौती रहेकाले संघ, प्रदेश र स्थानीय तहबीच मजबुत समन्वय अत्यावश्यक रहेको बताएका छन् ।
हेटौँडामा बागमती प्रदेश स्वास्थ्य मन्त्रालयद्वारा आयोजित ‘एक जिल्ला–एक स्वास्थ्य सहर, एक स्थानीय तह–एक नमुना स्वास्थ्य संस्था’ सम्बन्धी कार्यक्रमलाई सम्बोधन गर्दै मन्त्री थापाले स्वास्थ्य क्षेत्रका बजेट तथा योजना निर्माणमा तीनै तह एकै ठाउँ बसेर योजना बनाए मात्र दोहोरोपन र खर्च नहुने स्पष्ट गरे ।
उहाँले प्रदेश सरकारले पठाएको सशर्त बजेट धेरै स्थानीय तहमा खर्च नहुने समस्या रहेको उल्लेख गर्दै कार्यक्रमको स्पष्ट भूमिका विभाजन र सहकार्य गर्नुपर्ने आवश्यकता औंल्याए । प्रदेश सरकारले स्थानीय तहका अस्पतालमा उपकरण र जनशक्ति उपलब्ध गराइरहेको र प्रदेश तहका अस्पतालमा सेवा विस्तार भइरहेको पनि उहाँले जानकारी दिए ।
मन्त्री थापाले यस वर्ष प्रदेश सरकारले ५० जना डाक्टर उत्पादनका लागि अध्ययन सुरु गराएको तथा छात्रवृत्तिय डाक्टरहरूलाई स्थानीय तहका अस्पतालमा पठाइरहेको बताए । अब स्वास्थ्य सहरको अवधारणा लागू भएकाले स्वास्थ्य क्षेत्रको बजेट र लगानीलाई प्राथमिकतामा राखिनु पर्ने बताए ।
कार्यक्रम बागमती प्रदेशका मुख्यमन्त्री इन्द्रबहादुर बानियाँको प्रमुख आतिथ्यतामा सम्पन्न भएको थियो । कार्यक्रममा स्वास्थ्य जनप्रतिनिधि तथा सरोकारवालाहरूको सक्रिय सहभागिता रहेको थियो ।
