- १४ कार्तिक २०८३, शनिबार / Oct 31, 2026
भक्तपुर । दशैंको सातौं दिन आज घरघरमा शुभसाइतको प्रतीक फूलपाती भित्राइँदैछ । तर भक्तपुरमा हिजै फुलपाती भित्राइएको छ । फूलपातीदेखि विजयादशमीसम्मको नेपाल पञ्चाङ्ग निर्णायक विकास समितिले निकालेको साइत एवं तालिका अस्वीकार गर्दै भक्तपुरमा फूलपाती भित्र्याइएको हो ।
तलेजुका पुजारीहरूले एक विज्ञप्ती जारी गर्दै असोज २३ गते फूलपाती मनाउने निर्णय गरेका थिए । साेही अनुसार तलेजुका मूल नाइकेले उक्त निर्णय सार्वजनिक गरेपछि भक्तपुरका नेवाः समदायले हिजै फूलपाती भित्र्याएका हुन् । नगर क्षेत्रमा २३ गते फूलपाती, २४ गते महाअष्टमी र २५ गते महानवमी मनाउन आह्वान गर्दै भक्तपुर नगरपालिकाले सार्वजनिक बिदा समेत दिएको छ ।
नयाँ तालिकाअनुसार भक्तपुरमा यसवर्षको दसैँको फूलपाती २३ गते बिहान ७:३४ को शुभसाइतमा गरी दिनभर फूलपाती भित्रयाएपछि घरघरमा मासु भित्र्याएर साँझ भोज खाएका थिए । यहाँका नेवाः सामुदायले आश्विन २६ गते शनिबार विजयादशमी पूजा गरी टीका ग्रहण गर्ने निर्णय गरेको छ । तलेजुका तान्त्रिक ज्योतिषहरुको अध्ययनबाट प्राप्त विषयलाई आधार मानेर फूलपाती मनाउन आह्वान गरेको नगरप्रमुख प्रजापतिले बताए ।
नेवारी परम्पराअनुसार असोज २३ गते फूलपाती भित्र्याएर कुछी भोज सुरु गरेको समाजसेवीकाे भनाइ छ । नेपाल पञ्चाङ्ग निर्णायक विकास समितिले भने विसं २०८१ को दसैँ असोज २४ गते फूलपाती भित्र्याउने शुभसाइत बिहान ७:११ बजे, असोज २५ गते एकैदिन महाअष्टमी, कालरात्रि र महानवमी तथा असोज २६ गते बिहान ८:३३ बजे देवी विसर्जन र टीका लगाउने उत्तम साइत ११:३६ बजे रहेको तालिका सार्वजनिक गरेको छ ।
भक्तपुरको प्रसिद्ध तलेजु भवानीको मन्दिरमा फूलपातीको दिनबाट विधिवत् रूपमा बडा दसैं सुरु भएको छ । रातो र सेतो कपडाको विशेष प्रकारको पोसाक, पछ्यौरा र पगरीलगायत तलेजुका पूजारी, नाइकलेलगायतले धार्मिक विधिअनुसार विशेष पूजा गरी तलेजुलाई दसैँ घर लैजाँदा परम्परागत विशेष बाजा बजाइएको थियो । फूलपाती, अष्टमी र नवमीमा गरी तलेजुमा ५४ बोका, ३२ राँगो र ३२ हाँसको बली दिने परम्परा छ ।
