- २८ श्रावण २०८३, बिहीबार / Aug 13, 2026
रसुवा । लुकाइ छिपाइ बाहिरी मुलुक तर्फ लैजान लागेको बीस हजार अमेरिकी डलरसहित एक नेपाली नागरिक पक्राउ परेका छन् । पक्राउ पर्नेमा आमाछोदिङ्मो गाँउपालिका ५ पाजुङका २२ बर्षिया नुर्पु तामाङ रहेको जिल्ला प्रहरी कार्यालय रसुवाले जनाएको छ ।
रसुवागढी नाका हुँदै चीनको केरुङतर्फ लैजान लागेको उक्त रकमसहित तामाङलाई गोसाईकुण्ड गाँउपालिका २ स्थित टिमुरेबाट रसुवागढीतर्फ गईरहेको अवस्थामा प्रहरीले पक्राउ गरेको हो ।
इलाका प्रहरी कार्यालय टिमुरे, प्रहरी चौकि रसुवागढी, सशस्त्र प्रहरी बल टिमुरे र रसुवा भन्सार कार्यालयको संयुक्त्त टोलिले चेक जाँचका क्रममा अमेरिकी डलर एक सयका नोट दुई सय थान गरी बीस हजार अमेरिकी डलरसहित पक्राउ गरेको रसुवा प्रहरी नायव उपरीक्षक केशव भट्टराईले बताए ।
तामाङलाई थप अनुसन्धानका लागि राजश्व अनुसन्धान बिभाग हरिहर भवन ललितपुर पठाईएको छ।
