- ३ बैशाख २०८३, बिहीबार / Apr 16, 2026
भक्तपुर । नेपाल मजदुर किसान पार्टीका केन्द्रीय सचिव एवम् संघीय सांसद प्रेम सुवालले बालबालिकाहरुलाई परम्परागत सीप प्रदान गर्न सके उनीहरुको भविष्य उज्ज्वल हुने बताउँनु भएको छ ।
भक्तपुर नगरपालिकाद्वारा सञ्चालित युवा लक्षित ४ महिने आधारभूत पाक शिक्षा र एड्भान्स सिलाई तालिमको समापन तथा प्रमाणपत्र वितरण कार्यक्तममा विहिबार सांसद सुवाले उक्त कुरा बताएका हुन । उनले युवाहरुलाई मद्यपान र धुम्रपानबाट टाढा राख्नुपर्ने बताउँदै बद्लिँदो समय सँगै पेशा व्यवसायहरु पनि परिस्कृत हुँदै गएको जानकारी दिए ।
विद्यार्थीहरुलाई सानो उमेरदेखि चित्रकला, कलाकारितातर्फ लाग्न प्रेरित गर्नु अभिभावक तथा शिक्षकको दायित्व भएको सांसद सुवालले बताए । कार्यक्रममा बोल्दै सांसद सुवालले सिलाई व्यवसाय आफैमा एउटा महत्वपूर्ण पेशा भएको बताउँदै सबै पेशा व्यवसाय सम्मानजनक भएकाले सन्तुलित भोजन पनि निरोगी हुने आधार भएको बताए ।
युवाहरुले समाज निर्माणमा विशेष योगदान पुर्याउनेतर्फ ध्यान दिनुपर्ने बताउँदै युवाहरुमा स्वयम्सेवाको भावना आवश्यक भएको र प्रशिक्षार्थी भविष्यका कुशल प्रशिक्षक हुने हुँदा राम्रोसँग ज्ञान हासिल गर्न सांसद सुवालले प्रेरित गरे ।
भक्तपुर नगरपालिकाका प्रमुख सुनिल प्रजापतिले युवा विद्यार्थीहरुलाई विश्वविद्यालयको प्रमाणपत्र सँगै हातमा कुनै एउटा सीप प्रदान गर्ने उद्देश्यले सीपमूलक तालिम सञ्चालनलाई निरन्तरता दिँदै आएको बताउँदै तालिमबाट प्राप्त ज्ञान र सीपले युवालाई आत्मनिर्भर बनाउन मद्दत पुर्याउने तर्क गरे ।
