- १५ जेष्ठ २०८३, शुक्रबार / May 29, 2026
काठमाडौँ, ३० जेठ । तीनकुने घटनामा आवेगपूर्ण गतिविधि गरेको आरोपमा पक्राउ परेका दुर्गा प्रसाईँ बाहेक अन्य ६ जनालाई पनि काठमाडौँ जिल्ला अदालतले थुनामा राख्न आदेश दिएको छ।
न्यायाधीश ध्रुबराज कार्कीको इजलासले ज्यान मुद्दामा अभियोगित जम्मा ७ जनालाई थुनामा पठाउने फैसला गरेको हो। थुनामा राखिनेहरुमा घर आगजनी र पत्रकार सुरेश रजकको हत्या घटनामा संलग्न आरोपितहरू पनि समावेश छन्।
अदालतले दुर्गा प्रसाईँसँगै सरोज गौतम, गोकर्ण शाही, डण्डपाणि रेग्मी, शुसिल बराल, केशव बस्नेत र जित बहादुर श्रेष्ठलाई थुनामा पठाउन आदेश दिएको छ।यो घटना पूर्व राजाको समर्थनमा २०८१ चैत १५ मा भएको प्रदर्शनका क्रममा तीनकुनेस्थित घरमा भएको आगजनीसँग सम्बन्धित छ। उक्त घटनामा समाचार सङ्कलनका लागि पुगेका पत्रकार सुरेश रजकको ज्यान गएको थियो।
प्रदर्शनकारीहरूले आगजनी गरेको कारणले प्रेम बहादुर श्रेष्ठ अध्यक्ष रहेको सुनौलो इन्द्रेणी बचत तथा ऋण सहकारी संस्थाको भवन पूर्ण रूपमा क्षतिग्रस्त भएको थियो। प्रहरी अनुसन्धान अनुसार, रामेछापको सुनापति गाउँपालिका घर भएका सरोज गौतम र अछाम पञ्चदेवलका गोकर्ण शाही समेत आगजनीमा संलग्न रहेको पाइएको छ।
