- २ कार्तिक २०८३, सोमबार / Oct 19, 2026
काठमाडौं । ट्राफिक प्रहरीले १० महिनामा काठमाडौं उपत्यकाभित्र ट्राफिक नियम उल्लङ्घन गर्ने आठ लाख जनाभन्दा धेरै गाडी चालकलाई कारबाही गरेको छ ।
काठमाडौं उपत्यका ट्राफिक प्रहरी कार्यालयको टोलीले चालू आर्थिक वर्षको वैशाख मसान्तसम्म काठमाडौं, भक्तपुर र ललितपुरमा ट्राफिक नियम उल्लङ्घन गर्ने आठ लाख चार हजार दुई सय ७२ जना चालकलाई कारबाही गरेको हो ।
कार्यालयका प्रवक्ता, प्रहरी वरिष्ठ उपरीक्षक (एसएसपी) जीवनकुमार श्रेष्ठले लेन अनुशासन, तीव्र गति, जाँड–रक्सी खाएर गाडी चलाउने, जथाभाबी हर्नलगायत विभिन्न कसुरमा चालकहरूलाई कारबाही गर्दा ५७ करोड ८४ लाख १९ हजार रुपैयाँ राजस्व सङ्कलन गरिएको जानकारी दिए ।
कारबाही गरिएकामध्ये लेन अनुशासनमा ५० हजार सात सय एक जना, जाँडरक्सी खाएर गाडी चलाउने ३२ हजार ८३ जना, तीव्र गतिमा गाडी चलाउने एक लाख आठ हजार आठ सय ३४ जना र रातो बत्ती बलेको बेला गाडी चलाउने २६ हजार एक सय ३६ चालक रहेका छन् ।
यस्तै गाडीमा यात्रु तोकिएभन्दा धेरै राख्ने पाँच हजार पाँच सय ७८ जना, क्युआरटीमार्फत ८२ हजार नौ सय ८४ जना र सीसीटीभी क्यामेराबाट ५३ हजार चार सय ६६ जना चालकलाई कारबाही गरिएको प्रवक्ता श्रेष्ठले बताए । रासस
