त्रिशूलीमा बेपत्ताको खोजी गर्न सरकारले माग्यो अन्तराष्ट्रिय सहयोग

काठमाडौं । चार दिनदेखि त्रिशूली नदीमा हराइरहेका दुई वटा बस र सवार यात्रुहरुको खोजीका लागि सरकारले भारत र बंगलादेशसँग सहयोग मागेको छ । गृहसचिव एकनारायण अर्यालसहित सिमलताल क्षेत्रको स्थलगत अनुगमन गरेर फर्किएपछि गृह मन्त्रालयका अधिकारीहरुले भारत र बंगलादेशका अधिकारीहरुसँग सम्पर्क गरी सहयोग मागेका हुन् ।

नेपालमा उपलब्ध सबै खालका प्रविधि र जनशक्ति प्रयोग गरेर खोजी गरिरहेको तर नभेटिदा खोजी कार्यमा सहयोग गर्न भारत र बंगलादेशलाई भनेको गृह मन्त्रालय अन्तर्गतको द्वन्द्व तथा विपद व्यवस्थापन महाशाखा प्रमुख डा. भीष्मकुमार भूसालले बताए ।

घटनास्थलको अवस्था र पानीको बहावको वेग लगायतका जानकारी आइतबार नै पठाइएको भन्दै भूसालले उताबाट प्रतिउत्तरको प्रतीक्षामा रहेको बताए ।