- ९ जेष्ठ २०८३, शनिबार / May 23, 2026
काठमाडौं । इस्तानबुलबाट काठमाडौं आएको टर्किस एयरलाइन्सको जहाज पहिलोपटक भारत लखनऊबाट ‘डाइभर्ट’ हुँदा यात्रुले सास्ती पाएका छन् । १ मे बुधबार बिहान ६ बजेर १० मिनेटमा काठमाडौं अवतरण गर्नुपर्ने ए ३३० टीके ०७२६ जहाज काठमाडौंको आकासमाथि आइसकेको थियो ।
तर, जहाजमा प्राविधिक समस्या आएको भन्दै दुईचार फन्का घुमाएर चालकदलले लखनऊ डाइभर्ट गरे । अर्को दिन अर्थात् आज लखनऊबाट काठमाडौंका लागि उडेको सोही जहाज पुनः दिल्ली डाइभर्ट भयो । त्रिभुवन विमानस्थलका प्रवक्ता सुवास झाका अनुसार जहाजमा प्राविधिक समस्या आएपछि भारत डाइभर्ट भएको हो ।
यात्रुहरूका अनुसार जहाजमा चालकदलले भने ‘काठमाडौं विमानस्थलमा समस्या आएको’ भन्दै अनाउन्स गरेका थिए । सोही जहाजमा यात्रा गरिरहेका डा अनुप सुवेदीले समेत सामाजिक सन्जाल एक्समार्फत यसबारे जानकारी गराएका छन् ।
डा सुवेदीका अनुसार लखनऊमा ग्राउन्ड स्टाफसँग कुरा गर्दा जहाजको नेभिगेसन प्रणालीमा समस्या आएको पुष्टि भएको थियो ।
