- २६ भाद्र २०८३, शुक्रबार / Sep 11, 2026
काठमाडौं । दाङमा करिब चार सय बिघा सार्वजनिक जग्गा अतिक्रमण भएको छ । जिल्ला प्रशासन कार्यालयको करिब एक बिघा जग्गा पनि अतिक्रमणमा परेको हो ।
प्रशासनको १३ बिघा १४ कठ्ठा जग्गामध्ये करिब एक बिघा जग्गा अतिक्रमणमा परेको प्रमुख जिल्ला अधिकारी रामबन्धु सुवेदीले बताए ।
घोराही उपमहानगरपालिका– १४ अन्तर्गत कपासीमा रहेको प्रशासनको जग्गासहित नेपाल संस्कृत विश्व विद्यालय, महेन्द्र बहुमुखी क्याम्पस र सार्वजनिक विद्यालयहरूको जग्गा बढी अतिक्रमणमा परेका छन् ।
अधिकांश अतिक्रमण व्यक्तिले गरेको प्रशासन कार्यालयले जनाएको छ । कति सुकुम्बारी हुन्, कति हुकुमवासी हुन्, यसबारे प्रशासनले विवरण तयार गर्ने जनाएको छ । कानुनी प्रक्रिया पुरा गरेर बसेका थिए वा थिएनन् भन्ने विषयमा प्रशासनले अनुसन्धान गरिरहेको छ ।
अतिक्रमित जग्गामा घरहरू बनाएर मानिसहरू बसोबास गर्नेदेखि पार्क निर्माण गर्नेसम्मका काम भएको छ । सरकारी तथा सार्वजनिक जग्गा संरक्षण गर्ने उद्देश्य अनुसार प्रशासन कार्यालयले जिल्लाका अन्य स्थानमा रहेका सार्वजनिक जग्गाको पनि खोजी कार्य गरिरहेको छ ।
