- २९ श्रावण २०८३, शुक्रबार / Aug 14, 2026
त्रिभुवन विश्वविद्यालयले उपाधि समकक्षता निर्धारण गर्ने कार्य बन्द गरेको छ।
नयाँ कानुनी व्यवस्थाअनुसार समकक्षताको जिम्मेवारी विश्वविद्यालय अनुदान आयोगलाई दिइएको छ।
त्रिवि पाठ्यक्रम विकास केन्द्रले साउन १ गतेदेखि नयाँ आवेदन लिन बन्द गरेको छ।
अब समकक्षतासम्बन्धी सम्पूर्ण आवेदन विश्वविद्यालय अनुदान आयोगमा दिनुपर्नेछ।
काठमाडौँ, ३२ असार । त्रिभुवन विश्वविद्यालय (त्रिवि) पाठ्यक्रम विकास केन्द्रले उच्च शिक्षाको उपाधि समकक्षता निर्धारण गर्ने कार्य पूर्ण रूपमा बन्द गरेको छ।
केन्द्रले सार्वजनिक गरेको सूचनाअनुसार ‘केही नेपाल ऐन संशोधन गर्ने ऐन, २०८२’ अन्तर्गत विश्वविद्यालय अनुदान आयोग ऐन, २०५० को दफा ६ मा गरिएको संशोधनपछि समकक्षता निर्धारण गर्ने अधिकार विश्वविद्यालय अनुदान आयोगलाई हस्तान्तरण गरिएको हो।
नयाँ कानुनी व्यवस्थाअनुसार अब उच्च शिक्षाको उपाधि समकक्षता निर्धारण गर्ने सम्पूर्ण जिम्मेवारी विश्वविद्यालय अनुदान आयोग (यूजीसी) ले बहन गर्नेछ।
यस व्यवस्थासँगै त्रिभुवन विश्वविद्यालय पाठ्यक्रम विकास केन्द्रले २०८३ साल साउन १ गतेदेखि समकक्षता निर्धारणका लागि नयाँ आवेदन लिन बन्द गरिसकेको जनाएको छ।
२०८३ साल असार ३२ गते प्रकाशित सूचनामा साउन १ गतेपछि समकक्षताका लागि आवेदन दिन चाहने विद्यार्थी, अभिभावक तथा अन्य सरोकारवालाले अब विश्वविद्यालय अनुदान आयोग मा सम्पर्क गरी आवश्यक प्रक्रिया पूरा गर्नुपर्ने उल्लेख गरिएको छ।
त्रिभुवन विश्वविद्यालयले नयाँ कानुनी व्यवस्थाअनुसार समकक्षतासम्बन्धी सेवा पूर्ण रूपमा विश्वविद्यालय अनुदान आयोगमार्फत सञ्चालन हुने भएकाले सम्बन्धित सबैलाई सोहीअनुसार प्रक्रिया अपनाउन आग्रह गरेको छ।
