कोरोना भाइरस विरुद्ध ल्याएको ४० लाख खोप डिस्पोज गरिँदै

काठमाडौं । कोरोना भाइरस विरुद्ध ल्याएको ४० लाख मात्रा खोप प्रयोगमा नआएपछि सरकारले ‘डिस्पोजल’ गर्दैछ । चीन सरकारले अनुदानमा उपलब्ध गराएको कोरोना भाइरसविरुद्धको साइनोभ्याक खोप प्रयोग नगरी म्याद सकिएपछि स्वास्थ्य तथा जनसङ्ख्या मन्त्रालयले विर्सजन गर्ने तयारी गरेको हो ।

४० लाख मात्रा खोप विसर्जनको तयारी भइरहेको मन्त्रालयका प्रवक्ता डा प्रकाश बुढाथोकीले बताए । खोपलाई धेरै तापक्रममा वा इँटाभट्टामा राखेर जलाउने भन्नेमा छलफल भइरहेको प्रवक्ता डा बुढाथोकीले बताए । बुस्टर डोजका लागि प्रयोग हुन नमिल्ने भएपछि विगत साढे दुई वर्षदेखि स्वास्थ्य सेवा विभागको केन्द्रीय भण्डारणमा खोप थन्किएका छ ।

विश्व स्वास्थ्य सङ्गठनले बुस्टर डोजका लागि प्रयोग गर्न नभनेपछि राष्ट्रिय खोप सल्लाहकार समितिले उक्त खोप नलगाउने निर्णय गरेको थियो । खोप चीन सरकारबाट अनुदानमा विसं २०७८ वैशाख १२ गते ३४ लाख ४३ हजार तीन सय ६० मात्रा र वैशाख १४ गते पाँच लाख ५६ हजार ६ सय ४० मात्रा नेपाल आएको थियो । पहिलो र दोस्रो मात्रा खोप लगाउने मानिस नभएपछि खोपको प्रयोग नभएको बाल स्वास्थ्य तथा खोप शाखा प्रमुख डा अभियान गौतमले बताए ।