रूस–युक्रेन युद्धमा विदेशी सैनिक संलग्न रहेको जेलेन्स्कीको आरोप

एजेन्सी, २० साउन । युक्रेनका राष्ट्रपति भोलोदोमिर जेलेन्स्कीले रूस–युक्रेन युद्धमा चीन, पाकिस्तान, ताजिकिस्तान, उज्बेकिस्तान र केही अफ्रिकी मुलुकका भाडाका सैनिकहरू संलग्न रहेको आरोप लगाएका छन्।

पूर्वी युक्रेनको वोवचान्स्क क्षेत्रमा खटिएका युक्रेनी सैनिकहरूको मनोबल बढाउन गएका राष्ट्रपति जेलेन्स्कीले त्यहाँ सैनिक कमान्डरहरूसँग फ्रन्टलाइनको स्थिति बारे जानकारी लिएका थिए।

सामाजिक सञ्जाल X (पूर्व ट्विटर) मार्फत राष्ट्रपति जेलेन्स्कीले ती विदेशी सैनिकहरूको सहभागिताप्रति आपत्ति जनाउँदै त्यसको “प्रतिकार” गर्ने चेतावनी दिएका छन्।

यसअघि सन् २०२४ को अक्टोबरमा पनि उत्तर कोरियाली सैनिकहरू युक्रेनमा रूसी सेनाको पक्षमा खटाइएको खबरहरू सार्वजनिक भएका थिए।