- २ श्रावण २०८३, शनिबार / Jul 18, 2026
काठमाण्डौ । एक हप्ताभन्दा लामो समयदेखि चलेको लू अझै चार दिनसम्म चल्ने अनुमान गरिएको छ । तत्काल पानी पर्ने सम्भावना नरहेको ले अझै केही दिन लु चल्ने मौसमविद्ले अनुमान गरेका हुन । तातो हावा लू का कारण तराई मधेसको जनजीवन प्रभावित बनेपछि धेरैजसो विद्यालय बन्द भएका छन् । अस्पतालमा बिरामीको चाप बढ्न थालेको जनाएको छ । पश्चिमी वायु कमजोर रहेकाले तराई मधेसमा अझै चार र पाँच दिन मौसम यस्तै रहने अनुमान गरिएको छ ।
अत्यधिक गर्मी र तातो हावा लू का कारण टाउको दुख्ने, रिँगटा लाग्ने, वान्ता हुने, ज्वरो आउने, मांसपेशी दुख्ने जस्ता स्वास्थ्य समस्या देखिन थालेको विज्ञहरुले बताएका छन्।
गर्मी र लू का विषयमा स्वास्थ्य मन्त्रालय र प्राधिकरणमा अनौपचारिक कुराकानी भइरहे पनि कसरी अगाडि बढ्ने भनेर औपचारिक छलफल भएको छैन । सरकारले मनसुनी समयमा हुने बाढी, पहिरो तथा डुबानलगायतका प्रकोपलाई विपद् अन्तर्गत राखे पनि लू तथा गर्मीलाई विपद् अन्तर्गत राखेको छैन ।
यसले गर्दा पनि यस्तो बेला कसरी नागरिकलाई राहत दिने भन्नेबारे कुनै योजना बनाउन कठिनाइ भएको प्राधिकरणकले जनाएको छ । गर्मीले नागरिकलाई घर बाहिर निस्कन समेत मुस्किल पर्ने गरेको छ । डाक्टरहरुले घाम चर्किएका बेला सकेसम्म घर बाहिर नहिँड्न सुझाव दिँदै आएका छन् । राष्ट्रिय विपद् जोखिम न्यूनीकरण तथा व्यवस्थापन प्राधिकरणले पनि चर्को घाममा नहिँड्न तथा हिँड्नै परे छाता ओड्न, पातला कपडा लगाउन आग्रह गरेको छ ।
धिकरणले प्रभावित क्षेत्रका पालिका तथा प्रदेशसँग पनि सहकार्य र समन्वयका लागि छलफल गर्ने तयारी गरेको छ । स्थानीय सरकारले पनि अहिलेसम्म लू प्रभावित क्षेत्रमा राहतका कुनै कार्यक्रम ल्याएको छैन । नागरिकलाई सतर्कता अपनाउन आग्रह गर्दै आए पनि सरकारले प्रभावितको राहतका लागि भनेर कुनै योजना भने ल्याउन सकेको छैन ।
