अपराध बढ्दै जाँदा समस्या, ११ महिनामा देशभर ५ सय ४८ जनाको हत्या

काठमाडौं । देशै भर आपराधीक गतिविधिहरु बढिरहेका छन् । मानिसहरु सुरक्षित अवस्था रहन सक्ने अवस्था नरहेको तथ्यांकले देखाएको छ । आर्थिक वर्ष २०७८ साउनदेखि २०७९ जेठसम्मको तथ्याकं हेर्ने हो भने आपराधीक गतिविधिले उच्च रुप लिएको देखिन्छ पछिल्लो ११ महिनामा देशभर ५ सय ४८ जनाको हत्या भएको तथ्यांक सार्वजनिक भएको छ । हत्यामा संलग्न आरोपीमध्ये अधिकांश कानुनी दायरमा आएको प्रहरीले जनाएको छ ।

आर्थिक वर्ष २०७८ साउनदेखि २०७९ जेठसम्म ९ सय ६२ वटा ज्यान मार्ने उद्योगका घटना भएका छन् । भवितव्यमा परेर ४ हजार १५२ जनाले ज्यान गुमाएका छन् । साउन यता १५ सय २२ वटा फुटकर ज्यान सम्बन्धी घटना भएका छन् । बेवारिसे अवस्थामा भेटिएका र पहिचान नखुलेका घटनालाई प्रहरीले फुटकर ज्यान सम्बन्धी घटना भन्ने गरेको छ । ११ महिनामा प्रहरीले गर्भ संरक्षण विरुद्ध कसुर गर्ने ३३ जनालाई मुद्दा चलाएको प्रहरी प्रधान कार्यालयले जनाएको छ ।

हत्याका घटना प्रदेश १ मा सवैभन्दा धेरै भएको छ । पछिल्लो ११ महिनामा प्रदेश–१ मा ११२ वटा हत्याका घटना भएका छन् । मधेश प्रदेशमा १०४ वटा ज्यान सम्बन्धी कसुरमा मुद्दा दर्ता गरिएको छ । काठमाडौं उपत्यकामा ४२ जनाको हत्या भएको जनाइएको छ ।

लुम्बिनी प्रदेशमा ९८ वटा हत्याको घटना भएको र बागमती प्रदेशमा ६०, गण्डकीमा ४२, कर्णालीमा ३७ र सुदुरपश्चिम प्रदेशमा ५३ जनाको हत्या भएको प्रहरी प्रधान कार्यालयले जनाएको छ । २०७८ साउनदेखि २०७९ जेठसम्ममा ७ प्रदेश र उपत्यकामा ५४८ वटा ज्यान सम्बन्धी कसुरमा मुद्दा दर्ता गरिएको प्रहरी प्रधान कार्यालयको तथ्याकंले उल्लेख गरेको छ ।