असारमा बाढी पहिरोको जोखिम सजग रहन आग्रह

काठमाण्डौ । बाढी पहिरोमा परेर सङ्खुवासभामा २१ जना तथा ताप्लेजुङ र पाँचथरमा तीन–तीन जना बेपत्ता भएका छन् । पूर्वी पहाडी जिल्लामा बाढी पहिरोमा परेर हराइरहेका २७ जना अझै भेटिएका छैनन् । उनीहरूको खोजी भइरहे पनि अवस्था पत्ता लागेको छैन । गएको शनिवार र आइतवार आएको बाढी पहिरोमा परेर अहिलेसम्म आठ जनाको ज्यान गएको पुष्टि भएको छ ।

लगातार पानी परिरहेकाले खोजीमा कठिनाइ भइरहेको प्रदेश प्रहरी कार्यालय विराटनगरले जनाएको छ । बाढी पहिरोले सडक ध्वस्त भएकाले प्रभावित क्षेत्रमा उद्धार र राहत वितरणमा समस्या भइरहेको छ । पहिरोले मध्यपहाडी राजमार्गको पाँचथर–तेह्रथुम सडक खण्ड पनि बन्द भएको छ ।

मङ्गलवार यी जिल्लामा ठूलो पानी पर्ने सम्भावना रहेकाले सतर्कता अपनाउन मौसमविद्ले आग्रह गरेका छन् । ताप्लेजुङ र पाँचथरमा तीन र तीन जना तथा भोजपुर र सङ्खुवासभामा एक र एक जनाको ज्यान गएको पुष्टि भएको प्रहरीले जनाएको छ । छ जना घाइते भएका छन् ।