- ३१ असार २०८३, बुधबार / Jul 15, 2026
काठमाडौं । नेकपा एमालेले सरकारलाई समयमा चुनाव गर्न दबाव दिने भन्दै जनसंगठन समन्वय संयन्त्रको बैठक बोलाएको छ । बैठक शनिबार दिउँसो ३ बजे बस्ने नेकपा एमाले प्रचार विभाग उपप्रमुख विष्णु रिजालले जानकारी दिए ।
दुई वटा एजेण्डामा छलफल गर्न बैठक बोलाएको उनको भनाइ छ । सत्ता गठबन्धनमा निर्वाचन ऐन संशोधन गरेर आगामी कार्तिकमा पुर्याउने तयारी भइरहेका बेला वैशाखमै स्थानीय तहको निर्वाचन गर्नुपर्ने पक्षमा उभिएको एमालेले पार्टीका विभिन्न जनसंठनमार्फत दबावका कार्यक्रम अघि बढाएको जानकारी दिएको छ ।
जनसंगठनहरुले आआफ्नो ठाउबाट दबाव दिन पार्टी परिचालन गर्नेगरी बैठकमा निर्णय हुने, जनसंगठन सञ्चालन निर्देशिका पारित गर्ने कार्यक्रम रहेको रिजालको भनाइ छ ।
संयन्त्रमा विद्यार्थी, युवा, महिला लगायत २२ वटा संगठन रहेको संयन्त्रका संयोजक नेता भानुभक्त ढकाले बताए। भक्तपुरको जर्मन हस्पिटालिटी होम्समा बस्ने बैठकमा २२ वटै जनसंगठनका इन्चार्ज, सहइन्चार्ज र अध्यक्ष सहभागी हुने बताइएको छ ।
सवै जनसंगठनमा सहइन्चार्ज नभएपनि इन्चार्ज र अध्यक्ष छन् । ५० जना भन्दा बढिको उपस्थितिमा संयन्त्रको बैठक बस्न लागेको छ । उपप्रमुख रिजालले बैठकमा स्वास्थ्य मापदण्ड पालना गरेर बैठक बस्ने जानकारी दिए ।
