- १६ जेष्ठ २०८३, शनिबार / May 30, 2026
चितवन । नयाँ नेतृत्व चयन गर्नका लागि भएको नेकपा एमालेको महाधिवेशनको निर्वाचन सकिएको छ । करिब २ हजार ८० भन्दा बढी मत खसेको केन्द्रीय निर्वाचन समितिले जनाएको छ । खसेको मत विवरण औपचारिक रुपमा सार्वजनिक हुन बाँकी रहेको छ ।
२ हजार १ सय ५३ प्रतिनिधिमध्ये २ हजार ८० भन्दा बढी मत खसेको निर्वाचन समितिका एक सदस्यले बताए । विद्युतीय मेसिन प्रयोग गरिएकाले मत परिणाम छिटो सार्वजनिक हुने अपेक्षा गरिएको छ ।
मंगलबार बिहान ४ः०० बजेदेखि सुरु भएको मतदान भर्खरै सकिएको हो । रातभर जाग्राम बसेका प्रतिनिधिहरु बन्दसत्रमा मत खसाल्न लालायित भएका थिए । प्रतिनिधिहरुको लाइनमै पुगेर उम्मेदवारहरूले पनि भोट मागेका थिए ।
बन्दसत्रमा अध्यक्षसहित केही पदाधिकारी र केन्द्रीय सदस्य चयनका लागि निर्वाचन भएको हो । सुरुमा अध्यक्षका उम्मेदवार केपी शर्मा ओलीले मतदान गरेका थिए । अध्यक्षमा ओली र भीम रावलबीच कडा प्रतिस्पर्धा हुने भएको छ ।
