- २७ श्रावण २०८३, बुधबार / Aug 12, 2026
काठमाडौं । कालापानी, लिपुलेक र लिम्पियाधुरा क्षेत्रमा पनि जनगणना गरिने भएको छ । बुधबार पत्रकार सम्मलेन गरेर लिपुलेक कालापानी क्षेत्रमा राष्ट्रिय जनगणना– २०७८ मा जनगणना हुने तथ्याङ विभागले जनाएको छ । अनुमानसहितको नतिजा प्रकाशित गर्ने विभागका महानिर्देशक नेविनलाल श्रेष्ठले बताए ।
विभागले उक्त क्षेत्रमा जनगणनाको लागि भारतसँग कूटनीतिक पहल भइरहेको जनाएको छ । विभागका महानिर्देशकले भने, तीन वटा ‘विकल्प छन्, हाम्रो भूमिमा भारतीय सेनाले हामीलाई छिर्न नदिएको अवस्थामा सेना लगेर जनगणना गराउने, जुन सम्भव छैन, दोस्रोमा केही नगर्ने, तेस्रो, कुटनीतिक पहल भइरहेको छ ।’
राष्ट्रिय जनगणनामा ४० हजार गणकले घर–घरमा पुगेर तथ्याङ्क लिनेछन् । हरेक घर, परिवारसम्म पुगेर कुल ८० वटा प्रश्न हाराहारी सोधिने भएको छन् भने एक परिवारमा औसतः एक जना गणकले २० मिनेट लगाउने छन् । जनगणनामा सोधिने प्रश्नको उत्तर गोप्य रहने भन्दै श्रेष्ठले सबैलाई ढुक्क भएर भाग लिन अनुरोध गरे ।
एक जना गणकले औसतमा १५ दिनमा १७५ परिवारको गणना गर्नुपर्ने जनाइएको छ । जनगणनाको तथ्यांक संकलन १५ दिनभित्रै सक्नुपर्ने छ । अहिले संकलन गरिएको तथ्यांक प्रशोधन गरेर नतिजा प्रकाशन गर्न ६ देखि ८ महिना लाग्ने छ । संकलित तथ्यांक मङ्सिर मशान्तसम्म केन्द्रमा आउने र प्रारम्भिक नतिजा ३ महिनाभित्र दिने विभागको तयारी छ ।
विवरण संकलन गरी जनगणनाको शुरुआत गरिने भएको छ । गणकहरु बिहान ९ः३० बजे राष्ट्रपति कार्यालय पुग्ने छन् । त्यसपछि गणकहरु बिहान ११ बजे प्रधानमन्त्री शेरबहादुर देउवाकोमा र दिउँसो १ बजे उपराष्ट्रपति कहाँ पुग्ने कार्यक्रम तय भएको श्रेष्ठले बताए ।
