- २८ जेष्ठ २०८३, बिहीबार / Jun 11, 2026
ताप्लेजुङ । तोकिएको समयमा स्थानीय तहले जग्गाको वर्गीकरण नगर्दा राजस्व संकलनकमा कमी आएको छ । समयमा जग्गा वर्गीकरण नगर्दा कित्ताकाट रोकिनुका साथै जग्गासम्बन्धी कारोबार न्यून हुँदा मालपोत कार्यालयमार्फत संकलन हुने राजस्वमा कमी आएको हो ।जग्गाको कित्ताकाट रोकिँदा संकलन हुँदै आएको राजस्वमा कमी आएको कार्यालयले जनाएको छ ।
गत आर्थिक वर्षको फागुन मसान्तसम्ममा मालपोत कार्यालयले रु ९७ लाख ९२ हजार चार सय ९३ राजस्व संकलन गरेको थियो । चालु आवको सोही अवधि अर्थात् फागुन मसान्तसम्ममा ८६ लाख ४७ हजार सात सय ११ मात्रै राजस्व संकलन गरेको छ । चालु आवको फागुन मसान्तसम्ममा राजस्व संकलन ११ लाख ४४ हजार सात सय ८२ ले कमी देखिएको छ ।
मालपोत कार्यालयले गत आवभरमा जग्गा रजिस्ट्रेसनबाट कुल एक करोड ४४ लाख ७३ हजार सात सय ५० राजस्व संकलन गरेको थियो । उक्त रकम बराबर राजस्व संकलन गर्दाको लिखत सङ्ख्या दुई हजार १० रहेको छ ।
मालपोत कार्यालय प्रमुख निर्मल शेर्पाले समयमा जग्गाको वर्गीकरण नभएका कारण कित्ताकाट रोकिँदा राजस्वमा संकलनमा कमी आएको बताए । जिल्लाका स्थानीय तहहरूले तोकिएको समयभित्र जग्गाको वर्गीकरण नगरेका कारण राजस्व संकलनमा कमी आउनुका साथै जग्गासम्बन्धी कारोबार गर्ने सेवाग्राहीसमेत प्रभावित भएको उनले बताए ।
