किसानलाई ७५ प्रतिशत अनुदानमा भैँसीका पाडा र बङ्गुरका पाठा

कैलाली । टीकापुर नगरपालिकाले यस वर्ष किसानका लागि भैँसीका पाडापाडी र बङ्गुरका पाठा कार्यक्रम ल्याएको छ । मासुमा आत्मनिर्भर बनाउन यस्तो कार्यक्रम ल्याएको हो ।

किसानलाई ७५ प्रतिशत अनुदानमा भैँसीका पाडा र बङ्गुरका पाठा किनेर दिने नगरपालिकाले जनाएको छ । ७५ प्रतिशत नगरपालिकाको लगानी र २५ प्रतिशत किसानको लगानीमा यो कार्यक्रम लागुहुने छ ।एकजना किसानलाई १० भन्दा बढी भैँसीका पाडा र बङ्गुरका पाठा दिने टीकापुर नगरपालिकाका पशु अधिकृत श्यामराज पाण्डेले बताए ।

पाडापालन गर्ने किसानलाई नगरपालिकाले घाँस, उपचार र प्राविधिक ज्ञानसमेत उपलब्ध गराउनेछ । अहिले यो कार्यक्रम नेपालका चार ठाउँमा मात्रै लागू भएको छ । सङ्घीय सरकारको सहयोगमा सञ्चालित पाडा हुर्काउने कार्यक्रम पनौती, रोल्पा, पोखरा र टीकापुरमा स्वीकृत भएको हो ।