- २२ कार्तिक २०८३, आईतवार / Nov 8, 2026
दोहा । आठ महिनाअघि कुवेत पुगेका १४ जना नेपाली कामदार अलपत्र परेका छन् । बाइक राइडर अर्थात् डेलिभरी ब्वाइको कामका लागि कुवेतको मेगा अवल्टिनीया कम्पनीमा पुगेका उनीहरु अलपत्र परेका हुन् । म्यानपावर कम्पनीले उनीहरुबाट प्रतिव्यक्ति दुई लाख ५० हजारदेखि तीन लाख लिएर राम्रो कमाई हुने भन्दै कुवेत पठाएको थियो ।
तर कुवेतमा आठ महिनासम्म पनि उनीहरुले काम नपाएपछि दुतावाससंग गुनासो गरे । काम नपाएपछि उनीहरुलाई त्यहाँ बस्न र खानकै समस्या भएको उनीहरुले बताएका छन् । दुई महिनासम्म पनि कम्पनीले काम नदिएपछि नेपाल जान्छौं भनेको पीडितमध्ये एक रेमन तामाङ भने ।
‘हामी लामो समय काम तथा बिना तलव कोठामा बन्दी सरह भएर बसेका छौं। यहाँ राम्रो आम्दानी हुन्छ भनेर नेपालमा बैंकबाट चर्को ब्याजदर ऋण काढेर यहाँ आएका छौं। घर परिवारले हामीसँगै अपेक्षा गरेको छ,’ अर्का एक पीडितले भने, ‘हामी यहाँ रहरले घुम्न आएका होइनौं।
बाध्यताले आएको हो, काम दिलाउन नसके हामीलाई उद्धार गर्नुहोस हामी यहाँ बन्दी भएर बस्न सक्दैनौं।’ कम्पनीले दुई महिना काम दिएर फेरि अहिले कामबिहीन बनाएर राखेको पीडितको भनाइ छ । अहिले पाँच जनालाई काम दिएको र बाँकी ९ जनालाई कोठामै राखेको उनीहरु बताउछन् ।
उता आफूहरुलाई पठाउने म्यानपावरलाई पटक– पटक सम्पर्क गर्दा कुनै वास्ता नगरेको उनीहरुले बताए । उनीहरुले आफूहरुको समस्या नेपाल सरकारलगायत सम्बन्धित निकायसम्म पुर्याइदिन र आफूहरुलाई सकुशल उद्धार गरिदिन संचार माध्यममार्फत अनुरोध गरेका छन् ।
उता उनीहरुले चार पटक कुवेतस्थित नेपाली दूतावासमा पुगेर गुनासो गरेको तर सुनवाइ नभएको बताएका छन् । नेपाल फिर्ता पठाइदिन दूतावासलाई धेरै पटक गुहारे गरिसकेको तर दूतावासले कुनै सहयोग नगरेको आरोप उनीहरुको छ ।
यता, दूतावासले भने कुनै प्रतिक्रिया दिएको छैन। यो विषयमा पटक पटक बुझ्न खोज्दा सम्पर्क हुन् सकेको छैन। केही समय काम नपाएको भने म्यानपावर कम्पनीका सञ्चालकले स्वीकार गरेका छन् ।
रेमन तामाङ, गगन राई, दिलिप यादव, मुक्ती चौधरी, निर्मल धन राई, बद्री राम, सुरज पुन मगर, अर्जुन कामी, रजन यादव, रवि गुरुङ, सरोज राम्तेल, राज चम्लिङ राई, सुबश तामाङ, राम चन्द्र सार्की अलपत्र परेका छन् ।
