गौतम बुद्धको दर्शनका लागि आजदेखि ‘बुद्ध थिएटर फेस्टिभल’ सुरु

काठमाडौं । गौतम बुद्धको दर्शन तथा बोधिसत्वको प्रभावलाई रंगमञ्चमार्फत विश्वमाझ चिनाउने उद्देश्यले ‘बुद्ध थिएटर फेस्टिभल’ को तेस्रो संस्करण आजदेखि सुरु हुने भएको छ ।

वाग्मती प्रदेश सरकारको सहयोग, सांस्कृतिक संस्थान र डबली थिएटरको आयोजनमा काठमाडौंमा हुन लागेको फेस्टिभल चैत १७ गतेसम्म चल्ने छ । फेस्टिभलमा नेपालका ६ नाटकहरु मञ्चन हुने निर्देशक पुस्कर गुरुङले बताए ।

यसअघिका फेस्टिभलमा विदेशी नाटकहरु पनि समावेश गराइए पनि यसपटक राम्रो कथावस्तु भएको विदेशी नाटकहरु नआएकाले नेपाली नाटकमात्र समेटिएको निर्देशक गुरुङ बताए । माया थापाको निर्देशनमा तयार भएको नृत्य नाटीका ‘चंण्डालीका’ समेत मञ्चन हुने बताइएको छ ।

महोत्सवको उदघाटन समारोहमा रंगकर्मी अनुप बराललाई ५० हजार धनराशीको ‘डबली अवार्ड’समेत प्रदान गरिने छ ।